16 январь куни Эрон қўшни Покистон ҳудудига дронлар ва ракеталар билан зарба берди. Эрон давлат матбуоти хабар қилишича, Эронга қарши бўлган ярим ҳарбийлаштирилган сунний “Жайш ал-Адл” гуруҳининг икки штаби нишонга олинган.
Покистон расмийлари мамлакат ҳудудига “ноқонуний ва асоссиз ҳужум” уюштирилганини тасдиқлаб, икки бола ҳалок бўлганини, яна уч нафари яраланганини қўшимча қилди. Расмий хабарларда бу айнан қаерда содир бўлгани айтилмаган, бироқ Покистон ижтимоий тармоқларида Эрон билан чегарадош Балужистон вилоятидаги портлашлар ҳақида кўплаб хабарлар пайдо бўлган. AP агентлиги Покистоннинг икки расмийсига таяниб, Эрон чегарасидан 50 километр узоқликда жойлашган Балужистонда масжидга зарар етганини хабар қилди.
Покистон расмийлари “Покистон суверенитетини бузиш қабул қилиб бўлмайдиган ҳолат экани ва жиддий оқибатларга олиб келиши мумкинлиги”ни таъкидлади. Теҳрон бу таҳдидга муносабат билдирмади.
2012 йилда асос солинган “Жайш ал-Адл” Эрон билан чегарадош Систон ва Балужистон вилоятидаги суннийларнинг диний ҳуқуқлари учун курашаётганини айтади. Гуруҳ жангчилари бир неча бор Эрон ҳудудига бостириб кирган.
Изоҳ (0)