Украина ҳукуматида Ғарб давлатларининг ҳарбий ёрдами камайган тақдирда қўллайдиган Б режа йўқ, деди Украина ташқи ишлар вазирлиги раҳбари Дмитрий Кулеба. У Киевни қўллаб-қувватлаш давом этишига умид билдирди.
CNN телеканалига берган интервьюсида вазирдан АҚШ ва Европа Иттифоқидан ҳарбий ёрдам келмай қолган тақдирда, Украинанинг захира режаси борми, деган савол берилди.
“Бизда Б режаси йўқ. А режага ишонамиз”, — деб жавоб берди Кулеба.
Вазирнинг сўзларига кўра, Украина “ўзидаги ресурсларни ҳисобга олган ҳолда курашмоқда”. Унинг таъкидлашича, Киевга кўрсатилган ёрдам хайрия эмас, балки “НАТО мудофааси, Америка халқининг фаровонлиги учун қилинган сармоядир”.
Дмитрий Кулебанинг фикрича, агар Россия ғалаба қозонса, “дунё етакчилари ундан ўрнак олиш васвасасига тушиб қолади”.
2023 йил октябрь ойида Украина президенти офиси раҳбарининг маслаҳатчиси Михаил Подоляк Ғарб томонидан қурол-яроғ етказиш чўзилиб кетаётганидан шикоят қилганди. Унинг айтишича, мамлакат чет эл сармояси ёрдамида қурол ишлаб чиқаришни кўпайтиришни режалаштирмоқда. Декабрь ойида Германия мудофаа вазири Борис Писториус Украинага қурол-яроғ етказиб беришда кечикишлар бўлганини тан олди. Пентагон, шунингдек, Вашингтон Киевга қурол етказиб бериш учун маблағ камлигини маълум қилди.
Изоҳ (0)