Россия 3-5 йил ичида Шимолий Атлантика альянси учун жиддий ҳарбий таҳдидга айланиши мумкин, деди Эстония бош вазири Кая Каллас Тhе Тimes газетасига берган интервьюсида.
“Бизнинг разведкамиз ҳисоб-китобларига кўра, бунга уч йилдан беш йилгача вақт керак бўлади, бу кўп жиҳатдан бирликни қандай сақлаб қолишимиз ва Украина бўйича позициямизга боғлиқ”, — деди у.
Сиёсатчи келтирган Эстония ташқи разведка хизмати ҳисоботида айтилишича, Россия Болтиқбўйи мамлакатларини альянснинг “энг заиф қисми” деб билади ва уларга қарши душманона ҳаракатлар қилиши мумкин.
Шунинг учун Каллас НАТОни Совуқ уруш услубидагидек Россияни “тийиб туриш” стратегиясини қабул қилишга чақирди. Бу борада альянс дуч келиши мумкин бўлган муаммолар қаторида Эстония бош вазири қурол-яроғ тақчиллиги ва кўп сонли қўшинни жадаллик билан фронт чизиғига жойлаштиришдаги қийинчиликларни санади.
Россия президенти Владимир Путин НАТО билан зиддиятни истисно қилган. Унинг сўзларига кўра, Москвада альянс мамлакатлари билан курашиш учун “ҳеч қандай сабаб, на геосиёсий, на иқтисодий ва на сиёсий ёки ҳарбий манфаат” йўқ.
Изоҳ (0)