АҚШ президентлигига Республикачилар партиясидан энг ёш номзод, келиб чиқиши ҳиндистонлик тадбиркор Вивек Рамасвами Айовa штатидаги илк бошланғич сайловларда муваффақиятсизликка учрагач, сайловолди компаниясини якунлашга қарор қилди.
CNN маълумотларига кўра, ўзини Республикачилар партиясидан президентликка номзод деб кўрсатган тадбиркор Вивек Рамасвами сайловда қатнашишдан бош тортган.
“Бугун ростини айтаман. Биринчи аччиқ ҳақиқат — мен учун бу оғир бўлди, тан олишим керак — лекин биз буни (сайловда қатнашишдан бош тортишни) ҳар томонлама ўйлаб кўрдик. Менимча, бу тўғри. Биз бугун кутилган сюрпризга эриша олмадик”, — деди Рамасвами Айовa штатидаги сайловолди штаб-квартираси вакиллари билан учрашувда.
Тадбиркор ўз тарафдорларини Айовa штатидаги илк кокусларда ғолиб чиққан собиқ президент Дональд Трампни қўллаб-қувватлашга чақирди. Трампга овоз беришга ундаш учун шахсан Нью-Ҳемпширга бормоқчи.
38 ёшли Вивек Рамасвами 2024 йил ноябрида бўлиб ўтадиган сайловларда АҚШ президентлигига номзод бўладиган энг ёш иштирокчи эди. Сайловолди ташвиқотида у ёшларнинг меҳрини қозонишга интилди. Рамасвами Республикачилар партиясига янги, илҳомлантирувчи миллий ғоя кераклигини, чунки “эътиқод, ватанпарварлик ва меҳнатсеварлик ҳозир таназзулга юз тутаётганини” таъкидлаган. У бошқа республикачиларни 1980 йилларда оммалашган шиорларни ҳамон такрорлаб юргани учун танқид қилган. Шу билан бирга, Рамасвами Республикачилар партиясининг Дональд Трампга қарши курашишга уринмаган ягона вакили эди, аксинча, бошиданоқ уни қўллаб-қувватлаган ва ҳатто уни “XXI асрнинг энг буюк президенти” деб атаган.
Эслатиб ўтамиз, Дональд Трамп Айовa штатидаги биринчи бошланғич ички партия сайловларида (кокуслар) ғалаба қозонди. Республикачиларнинг қарийб 51 фоизи уни қўллаб-қувватлаган. Флорида губернатори Рон ДеСантис иккинчи ўринда, уни штат республикачиларининг 21,3 фоизи қўллаб-қувватлади. АҚШнинг БМТдаги собиқ элчиси Никки Ҳейли 19,1 фоиз овоз билан учинчи ўринда.
Изоҳ (0)