Россиялик блогер рухсатсиз Тошкент телеминорасининг учигача чиқди (видео)

Instagram’да Raksmane номи остида руфинг билан шуғулланувчи блогер Тошкент телеминорасининг учига чиққани тасвирланган видео билан бўлишди.

Унинг ёзишича, телеминорага киришда ички ишлар ходимлари барча асбоб-ускунaларини олиб қўйган.

“Дастлабки 100 метрни лифтда босиб ўтдим, кейинги 100 метрга эса ташқи томондаги қўриқчиларни айланиб ўтиб, зинадан чиқдим. Навбатдаги қисми эса ўт ўчирувчилар зинаси орқали ўтилди. Қўриқчилар сони ўшандаёқ ҳайрон қолдирган эди. Форма кийган полиция ходимлари киришда металлодетектор, кузатиб қўювчи ва лифт олдида кутиб олувчи стюартлар, формадаги қўриқчилар ва рация кўтарган ходимлар. Ўтиб кетиш худди уддалаб бўлмасдек эди”, — деб ёзади у.

 Блогерга кўра, у кўплаб камералар назоратидан ўтиб, юқорига кўтарилган. Йўл-йўлакай ўзини худди шлюзлар билан ажратилган кема ёки учар ликопча ичидагидек тасаввур қилган.

Тошкент телеминораси — Ўрта Осиёдаги энг баланд бино. Унинг баландлиги 375 метрдир. Расмий тилда Тошкент телеминораси H-375m объекти деб аталади. Телеминора 1978 йилдан бошлаб, 6 йил давомида қуриб битказилган. 1985 йилнинг 15 январида ишга туширилган.