Ижтимоий тармоқларда Тошкент шаҳридаги Амир Темур ҳайкали олдида юзлаб фуқаролар Ўзбекистонга келган россиялик блогерни кўриш учун тўплангани тасвирланган видеолар тарқалди. Пойтахт ИИББ мазкур ҳолат юзасидан расмий маълумот берди.
Маълум қилинишича, 13 июль куни тахминан соат 22:30 ларда Тошкент шаҳрига Instagram ва YouTube ижтимоий тармоқларида Субо номи билан танилган блогер – 22 ёшли Россия фуқароси Субхан Мамедов ташриф буюрган. Бундан олдинроқ у ўзининг саҳифасида тез орада Тошкентда бўлишини ва обуначилари билан учрашиб, уларга пул тарқатишини маълум қилган.
Шу сабабли пойтахтнинг Амир Темур хиёбонида Субони кутиб олиш учун 150-200 га яқин фуқаро йиғилган.
Ҳозирги кундаги эпидемиологик вазиятни инобатга олиниб, мамлакатда карантин чекловлари ўрнатилгани сабабли, Ички ишлар органлари ва Миллий гвардия ходимлари томонидан фуқароларга карантин қоидаларига риоя этишлари ҳамда оммавий равишда тўпланмасликлари тушунтирилган ва фуқаролар тарқатилган.
Блогер Субхан Мамедов билан эса профилактик суҳбат ўтказилган. Мазкур воқеада қонун бузилиши ҳолатлари ва тартибсизликлар юз бермаган.
Субхан Мамедовнинг сўзларига кўра, у Нукусда саратонга чалинган обуначисини ўз жамоаси билан Дубайга олиб кетиш учун келган. Кечаси Тошкентдан учишлари кераклиги сабаб йўлда Instagram’даги саҳифасига обуначиларини Амир Темур ҳайкали олдида кутишини ёзиб қолдирган.
«Майдон атрофидан ўтаётганимда жуда кўп оломон йиғилганини кўрдим. Машинадан тушишим билан одамлар мени ўраб олди. Бу ердан кетиш кераклигини тушундим ва полициячилар [ИИБ ходимлари] машинамга ўтиришимга ёрдам берди. Агар улар ўз вақтида чора кўрмаганида, барчаси ёмон тугаши мумкин эди…», — дейди блогер.
«Тошкент шаҳар ИИББ фуқароларимиздан бундай мазмундаги чақириқларга учмасликларини ва карантин қоидаларига риоя этган ҳолда оммавий равишда тўпланмасликларини сўраб қолади», — дейилади муносабатда.
Изоҳ (0)