Испаниянинг энг йирик банки Ўзбекистонга 500 млн доллар кредит ажратишга тайёрлигини маълум қилди

Ўзбекистоннинг Мадрид шаҳридаги элчихонасида Испаниядаги энг йирик, Европада эса бешликка кирувчи Сантандер банкининг минтақавий менежери Давид Плаза билан учрашув бўлиб ўтди. Бу ҳақда “Дунё” агентлиги хабар берди.

Қайд этилишича, суҳбат чоғида испан томони Ўзбекистон банк хизматлари бозорига кириш ҳамда мамлакатда амалга оширилаётган истиқболли йирик инвестицион лойиҳаларни молиялаштириш масалаларига қизиқиш билдирган. Шунингдек, мазкур лойиҳаларни молиялаштириш учун Сантандер банки Ўзбекистонга 500 миллион доллар миқдорида кредит маблағларини ажратишга тайёрлигини маълум қилган.

“Банк сўнгги икки йилда экспорт-импорт операциялари соҳасида тузилган битимлар сони бўйича Европада етакчи бўлиб келмоқда”, — дейилади хабарда.

Учрашув якунида Ўзбекистонда инвестиция лойиҳаларини молиялаштириш имконияти Испания банкининг ваколатхонаси очилишини жадаллаштириш омили бўлиши таъкидланган.

Аввалроқ Жаҳон банки Ижрочи директорлари кенгаши Ўзбекистонда рақамли инклюзивлик лойиҳасини амалга ошириш учун 50 миллион доллар миқдорида имтиёзли кредит ажратишни маъқуллагани тўғрисида хабар берилганди.