O‘zbekistonning Madrid shahridagi elchixonasida Ispaniyadagi eng yirik, Yevropada esa beshlikka kiruvchi Santander bankining mintaqaviy menejeri David Plaza bilan uchrashuv bo‘lib o‘tdi. Bu haqda “Dunyo” agentligi xabar berdi.
Qayd etilishicha, suhbat chog‘ida ispan tomoni O‘zbekiston bank xizmatlari bozoriga kirish hamda mamlakatda amalga oshirilayotgan istiqbolli yirik investitsion loyihalarni moliyalashtirish masalalariga qiziqish bildirgan. Shuningdek, mazkur loyihalarni moliyalashtirish uchun Santander banki O‘zbekistonga 500 million dollar miqdorida kredit mablag‘larini ajratishga tayyorligini ma’lum qilgan.
“Bank so‘nggi ikki yilda eksport-import operatsiyalari sohasida tuzilgan bitimlar soni bo‘yicha Yevropada yetakchi bo‘lib kelmoqda”, — deyiladi xabarda.
Uchrashuv yakunida O‘zbekistonda investitsiya loyihalarini moliyalashtirish imkoniyati Ispaniya bankining vakolatxonasi ochilishini jadallashtirish omili bo‘lishi ta’kidlangan.
Avvalroq Jahon banki Ijrochi direktorlari kengashi O‘zbekistonda raqamli inklyuzivlik loyihasini amalga oshirish uchun 50 million dollar miqdorida imtiyozli kredit ajratishni maʼqullagani to‘g‘risida xabar berilgandi.
Izoh (0)