Бухоро вилоятининг Шофиркон туманида фарзандини муттасил калтаклаб, қийнаб келган аёлга жиноят иши қўзғатилди. Бу ҳақда Болалар омбудсмани хабар берди.
Маълум қилинишича, Болалар омбудсмани котибиятига фуқаро Л.З. дан Бухоро вилояти Шофиркон туманида яшовчи аёл С.Н. кичик ёшдаги фарзандини икки йилдан бери калтаклаб, қийнаб келаётганлиги баён этилган мурожаат ва бу ҳолатга оид видео материаллар келиб тушган.
Мазкур ҳолат юзасидан Шофиркон тумани ички ишлар органлари олиб борган терговга қадар текширувда аниқланишича, С.Н. ўз фарзанди 2018 йилда туғилган С.Ф.ни бешикка боғлаган ҳолатда таёқ ва бошқа жисмлар билан муттасил равишда узоқ вақт давомида (2022 йилнинг март ойларидан 2023 йил ноябрь ойигача) калтаклаб, қийнаб келган.
Мазкур ҳолат юзасидан С.Н. га нисбатан Жиноят кодексининг 110-моддаси 2-қисми, “а,в” бандлари (вояга етмаган, ожиз аҳволдалиги аён бўлган шахсни қийнаш) билан жиноят иши қўзғатилиб, ҳозирда Шофиркон тумани ИИБ томонидан дастлабки тергов ҳаракатлари олиб борилмоқда.
Болалар омбудсмани мазкур ҳолат бўйича боланинг манфаатлари ишончли таъминланиши юзасидан ўз кузатувини давом эттиришини билдирди.
Изоҳ (0)