Қаршида онаси томонидан калтаклангани айтилган Акбаршоҳга етказилган тан жароҳати соғлиқни қисқа муддатга бузилишига олиб келмаган енгил тан жароҳати деб топилиб, боланинг калтакланиш воқеаси бўйича жиноят иши қўзғатиш рад этилгани маълум бўлди. Бу ҳақда болалар омбудсмани хабар берди.
“Дарё”да Акбаршоҳ Қаноатовнинг мунтазам равишда калтакланиши, болага руҳий босим ўтказилаётгани айтилган мақола эълон қилинганди. Унда боланинг отаси Улуғбек Азизовнинг фарзанди тақдиридан хавотирда экани билдирилганди.
Фарзандим Акбаршоҳнинг айни кундаги аҳволи мени ташвишлантирмоқда. Сабаби болам собиқ аёлим ва унинг айни кундаги турмуш ўртоғи Жасур томонидан доимий равишда калтакланаётганлиги, руҳий ва жисмоний босимлар олаётгани ота сифатида мени ташвишлантирмоқда. Шу сабаб “Дарё” нашрига мурожаат қилишга мажбур бўлдим, — деганди журналист билан суҳбат қилган Улуғбек Азизов.
Айтилишича, мазкур воқеа болалар омбудсмани томонидан ўрганиб чиқилган.
Видеоматериалда баён этилган воқеа 2020 йилда турмушдан ажрашган Л.Ж. ва А.У.нинг фарзанди 2018 йилда туғилган А.Қ. ота-онасидан қай бири билан яшаши масаласига оид ўзаро низодаги ота-оналарга тегишли вазиятдир, — дейилади масъул ташкилот муносабатида.
Таъкидланишича, отанинг фарзандига онаси томонидан зўравонлиги ва жароҳат етказганлиги тўғрисидаги аризаси асосида терговга қадар текширув жараёни ўтказилиб, болага нисбатан судга оид тиббиёт экспертизаси тайинланган.
2023 йил 6 ноябрда берилган экспертиза хулосасида боланинг танасида ўнг болдирни ўрта олдинги юзасида қонталаш кўринишидаги тан жароҳати борлиги аниқланиб, мазкур тан жароҳати соғлиқни қисқа муддатга бузилишига олиб келмаган енгил тан жароҳати эканлиги эътироф этилган ва бунга кўра жиноят иши қўзғатилиши рад қилинган. Бундан сўнг ҳам қўшимча терговга қадар текширув ўтказилган бўлиб, унинг натижасида 2023 йил 29 декабрь куни жиноят ишини қўзғатиш рад қилинган, — дейилади болалар омбудсмани берган маълумотда.
Таъкидланишича, 2023 йил 30 ноябрда Қарши шаҳар туманлараро фуқаролик суди томонидан чиқарилган ҳал қилув қарорига кўра, бола ўз онаси билан яшаши белгиланган.
Бугунги кунда ота суднинг мазкур мазмундаги қарори устидан норози бўлиб, юқори инстанцияга апелляция шикояти берган ва боланинг ўзи билан яшашини белгилашни талаб қилмоқда. Низо ҳозирда ҳам давом этмоқда ва болалар омбудсмани ушбу ҳолат бўйича бола манфаатлари устунлиги нуқтаи назаридан ўз кузатувини давом эттирмоқда, — дейди масъуллар.
Болалар омбудсмани мазкур вазиятни ёритаётганда ота-онанинг ўзаро низоси ва бир-бирига нисбатан илгари сураётган даъволари уларнинг фарзанди азият чекишига олиб келаётганига эътибор қаратишни сўраган.
Оммавий ахборот воситалари томонидан ана шундай баҳсли вазият ёритилаётганида ота-онанинг ўзаро низоси ва бир-бирига нисбатан илгари сураётган даъволари натижасида, биринчи навбатда, уларнинг фарзанди жабр кўраётгани, иккала ота-она ўртасида сарсон бўлаётганлигини алоҳида эътиборга олинишини сўраймиз. Жумладан, боланинг бевосита иштирокидаги лавҳаларни очиқлаш (ҳатто бунга ота-онаси рози бўлса ҳам), уни саволга тутиш, мураккаб вазият бўйича фикрини сўраш бола манфаатларига мутлақо мувофиқ эмас. Айниқса, мазкур видеоматериалда акс этган айрим ҳолатлар, хусусан, 5 ёшли бола билан ички ишлар органлари ходими ва журналист психолог ёки мутахассис-педагог иштирокисиз суҳбатлашиши процессуал қонунга ҳамда бола манфаатларига оид қонун нормаларига зид бўлиб, бундай ҳаракатларга йўл қўймасликка чақирамиз, — дейилади масъуллар муносабатида.
Боласи тақдиридан хавотирланаётган Улуғбек Азизов журналист билан суҳбатида болалар омбудсмани унинг мурожаатларини эътиборсиз қолдирганини гапирганди.
Болалар омбудсманига адвокатим билан бирга ҳужжатларни тайёрлаб, юборганмиз. Лекин анча вақтгача ўрганилмади. Кейинчалик телефон қилиб, воқеа тафсилотларини сўрашди. Ва бу ҳолатни Ички ишларга юборишларини айтишди. Нега омбудсманнинг ўзи ўрганмайди?, — деганди Улуғбек Азизов.
Болалар омбудсманининг қўшимча қилишича, ҳозирда ҳолат томонлама ўрганиш жараёнида.
Изоҳ (0)