Париж зарбхонасида Европа Иттифоқи томонидан дизайни маъқулланмаган 27 миллионта танга йўқ қилинди ва қайта босилди, деб ёзмоқда Politico.
Зарбхона янги дизайндаги 10, 20 ва 50 сентлик тангаларни 2023 йил ноябрь ойида Европа Иттифоқининг дизайн талабларини текширмасдан чиқарган. Кейинроқ Европа комиссияси тангаларда Европа Иттифоқи байроғидаги юлдузлар нотўғри тасвирланганини маълум қилди.
Декабрь ойи ўрталарида Франция тангаларнинг янгиланган версиясини тақдим этди ва Европа комиссияси уни тасдиқлади. Дизайни ошкор этилмаган янги тангалар 2024 йилнинг баҳорида намойиш этилади.
Франция Иқтисодиёт вазирлиги зарбхона тангаларни қайта босиш харажатларини ўз зиммасига олишини айтди, чунки у автоном жамоат компанияси бўлиб, Франция маъмуриятига кирмайди. Вазирлик таъкидлашича, бу борада мамлакат бюджетидан ҳеч қандай харажатлар бўлмайди.
Аввалроқ Франция зарбхонаси раҳбари Марк Шварц тангаларни зарб қилиш учун “Франция давлати” масъул эканини маълум қилганди, деб ёзади La Lettre. Нашрнинг ёзишича, бунга муассаса бюджетидан 1,2 миллион еврогача маблағ сарфланиши керак.
Европа Иттифоқи қонунларига кўра, аъзо давлатлар ўз миллий евро тангаларини ҳар 15 йилда бир марта ўзгартириши мумкин, аммо улар Европа комиссияси ва бошқа Еврозона ҳукуматларининг розилигини олиши керак. Улар хабардор қилиниши ва муносабат билдириши учун етти кун вақт берилиши зарур. Politico маълумотларига кўра, француз зарбхонаси ноябрь ойида ЕИ билан норасмий тарзда боғланиб, тангаларни зарб қилган ва шундан кейингина дизайнни тасдиқлашни расман сўраган.
Изоҳ (0)