Британия 2024 йилда Украинага 3 млрд доллар миқдорида ҳарбий ёрдам кўрсатишини эълон қилди

2024-молия йилида Буюк Британия Украинага 2,5 миллиард фунт стерлинг (уч миллиард доллардан ортиқ) миқдорида ҳарбий ёрдам беради, дейилади Британия ҳукумати баёнотида.

Буюк Британия бош вазири Риши Сунак 12 январь куни Киевга ташрифи арафасида ҳарбий ёрдам ҳақида эълон қилди. Сунак Украина президенти Владимир Зеленский билан учрашишни режалаштирмоқда.

Эълон қилинган маблағнинг камида 200 миллион фунт стерлинги минглаб дронлар, жумладан, разведка, ҳужум ва денгиз дронини сотиб олиш ва ишлаб чиқаришга сарфланади. Британия ҳукумати баёнотида бу харид Украинага энг катта партияда дрон етказиб бериш деб аталди. Бундан ташқари, молиялаштириш Украинани узоқ масофага учувчи ракеталар, ҳаво ҳужумидан мудофаа тизимлари ва артиллерия ўқ-дорилари билан таъминлайди.

Ҳукумат сайтида қайд этилишича, Буюк Британиянинг яқин икки йил ичида Украинага ҳарбий ёрдам сифатида ажратадиган маблағи 2022—2023 йиллардагидан 200 миллион фунт стерлингга кўп бўлади.

Бундан ташқари, инсонпарварлик ёрдами доирасида Буюк Британия яна 18 миллион фунт стерлинг (тахминан 23 миллион доллар) ажратади, унинг бир қисми БМТ ва Қизил Хочни қўллаб-қувватлаш ҳамда Россия ҳужумлари фонида Украинанинг энергетика инфратузилмасини мустаҳкамлашга йўналтирилади.

Шунингдек, Зеленский ва Сунак мамлакатлар ўртасида хавфсизлик соҳасида ҳамкорлик тўғрисидаги битимни имзолаши режалаштирилган. Бу разведка маълумотларини алмашиш, киберхавфсизлик, тиббий ва ҳарбий тайёргарлик, мудофаа-саноат ҳамкорлигини ўз ичига олади.

Риши Сунак 2022 йил ноябрида, Буюк Британия бош вазири сифатида Киевга биринчи марта келганида Лондон Украинани қўллаб-қувватлашда давом этишини ваъда қилганди.

Жами ҳисобда Буюк Британия Украинага деярли 12 миллиард фунт стерлинг ажратди, унга бугун эълон қилинган ёрдам пакети ҳам киради. Мамлакат, шунингдек, Киевга бошқа ёрдамлар, жумладан, Storm Shadow қанотли ракеталари ва Challenger 2 танкларининг эскадриляларини ҳам топширган.

АҚШ Конгрессда бюджет бўйича келишувга эришилмагани сабаб Украинага молиявий ёрдам тўхтатгани ҳақида эълон қилгач, Европа Иттифоқи дипломатияси раҳбари Жозеп Боррел Европа давлатларини Киевга ёрдамни оширишга чақирди.