Россиянинг Харьковга тунги ракета ҳужуми оқибатида камида 11 киши жароҳатланди, деб хабар берди Харьков вилояти маъмурияти раҳбари Олег Синегубов.
Унга кўра, россиялик ҳарбийлар 10 январь куни тахминан 22:30 да шаҳарнинг Киев туманига С-300 мажмуасидан ракета ҳужумини уюштирган. Оқибатда ҳужум вақтида 30 дан ортиқ одам бўлган меҳмонхона биносига зарар етган. Синегубовнинг таъкидлашича, гап тинч аҳоли ҳақида кетмоқда.
Бошқарма раҳбарининг аниқлик киритишича, ҳужумда 31 ёшдан 38 ёшгача бўлган тўрт эркак, шунингдек, 23 — 71 ёш оралиғидаги етти нафар аёл жароҳатланган. Жабрланган 11 кишидан икки нафарига воқеа жойида тиббий ёрдам кўрсатилган, қолганлари тиббий муассасаларга етказилган. Жабрланганлардан бирининг аҳволи оғир.
Харьков мери Игор Тереховнинг ёзишича, рус ҳарбийлари шаҳар марказидаги меҳмонхонага иккита ракета билан зарба берган. Унга кўра, жароҳатланганлар орасида туркиялик журналистлар ҳам бор. Миллий полиция маълумотларига кўра, ҳужум оқибатида Anadolu агентлиги мухбири яраланган. Агентлик бу маълумотни тасдиқлаб, ҳужум вақтида меҳмонхонада Anadolu’нинг икки ходими бўлганини қўшимча қилди.
Шаҳар ҳокими, шунингдек, ҳужумда турар жой бинолари, автосалон ва ишлаб чиқариш заводига зарар етганини айтди. Синегубовнинг қўшимча қилишича, тўқнашувда бир нечта автомобиль ёниб кетган.
Россия қўшинлари Украинага кенг кўламли босқин бошланганидан бери Харьковни мунтазам равишда ўққа тутмоқда.
Изоҳ (0)