Самарқанд вилоятидаги мактаблардан бирининг раҳбари ходими тўйига чақирмагани учун жазавага тушиб, унга қилинган ҳар бир ҳурматсизлик учун ўн ҳисса жавоб қайтаришини айтгани ҳақидаги аудио ижтимоий тармоқларда тарқалди. “Дарё”га билдирилишича, овоз вилоятнинг Пайариқ туманидаги 2-сонли умумтаълим мактаби директорига тегишли ҳисобланади. Ва у мактаб фарроши тўйига чақирмагани учун шундай гапларни гапирган.
Уялмасдан менга жавоб беради, “Гулҳаё шу таклифнома сенга келганда етмай қолди ёки дастурхонимдаги ноз-неъматимни сен еб қўясан, сен кўп овқат ейсан, деб ўйладим. Шу учун сени айтмадим-да, узр, қолган ходимларингни айтдим. Тартиблар эсимдан чиқибди, 2-мактаб жамоасида ишлашим эсимдан чиқибди. Сен мени кўп “поддержка” қилиб юбординг, ишлаяпманми, ишламаяпманми, менга қарамай қўйдинг, менинг бор-йўғимни ҳис қилмай қўйдинг. Мен ишламай, маза қилиб, юравериб, сени писанд қилмай қўйдим”, деб менга айтади шу гапимдан кейин. Мен эслатиб қўяман ҳали катта-катта йиғилишларда, — дейди ходими тўйига чақирмаганидан гина қилган мактаб раҳбари.
Мактаб директори овозли хабар йўллаб, тўйга чақирмаган ходимига мурожаат қилар экан, “Ҳаммани айтишга қурбингиз етмаса, ҳеч кимни айтманг, битта имконингиз бўлса ҳам раҳбарни айтинг. Чунки сиз ана шу ердан ризқланяпсиз. Ўша элнинг боши ҳақдор. У кишидан кейинги айтилганлар, раҳбарга нисбатан ҳурматсизлик қилганлар бўлади. Билмасангиз, билиб қўйинг, маданиятсизлик — бу. Раҳбарга нисбатан энг катта ҳурматсизлик. Шу жамоада ишлаб туриб, тўй қилганда, энг орзу ҳавасли кунида таклиф қилмаган инсон, билмадим, нима дегани бўлади у”, — дейди овоз эгаси.
Муассаса раҳбари жамоа учун битта таклифнома бўлса, шу ҳам раҳбарга берилиши кераклигини уқтиради.
Жамоа учун битта таклифнома бериш имкониятингиз бўлса, у ҳам раҳбарга берилиши керак. Бу умумий, маданиятли инсонларнинг қонунияти. Билмасангиз эслатиб қўяй. Тўй қиляпсизми, бир парча қоғозингизни раҳбардан қизғандингизми, дастурхонингиздаги овқатни еб қўяди деб ўйладингизми, ўша раҳбарнинг жамоасидагиларга ҳам тегинманг. Бошқаларни ҳам раҳбарига ҳурматсизлик қилишга ундаманг. Йўл қўйманг. Уларда фаросат бўлса, айтади. Ўв, раҳбарни айтдингизми, биз раҳбар бормаган жойга, раҳбар айтилмаган жойга қандай оёқ қўйиб, борамиз деб айтади. Фаросати бўлмаса, кетаверади, — дейди раҳбар.
Мактаб директори гапини давом эттирар экан, мактабга келганидан бошлаб, мактаб жамоасининг тўйи, тадбирлари қандай бўлишини жамоага ўргатганини билдиради.
Битта-иккитангиз унутиб қўйган бўлсангиз, эслатиб қўяй. Ҳар қадамида раҳбарнинг ҳиссаси бор, лекин яхши кунида раҳбарни тўйига айтмайди. Аксинча, ундан кейинги ходимларни айтиб, ичириб-ичириб, жўнатиб юборади. Бу нима дегани? Мен сизнинг раҳбарингизман, сиз мени ҳурмат қилишингиз керак эди. Ҳурмат қилмасангиз, бу жамоада нима қилиб юрибсиз деган саволларни бераман ҳали, — дейди ходимидан гина қилишда давом этган раҳбар.
Овоз эгаси бошлиқ борган жойда файз бўлишини айтади.
Агар сизга шу жамоанинг раҳбарини, шу жамоа аъзоси бўлиб, тўйга айтиш малол келса, бу жамоани чеккалаб ўтинг. Умуман ҳеч кимни айтмай, ўз-ўзингиз билан хурсандчилик қилинг, — дейди у.
Мактаб директори унга қилинган ҳурматсизлик учун ўн ҳисса жавоб қайтаришини айтади.
Оёғи ердан узилаётганлар, менинг борлигимни унутаётганлар, эшитиб қўйинг, мен нафас олар эканман, менга қилинган ҳар бир ҳурматсизликни унутмайман ва ҳаётим давомида ўн ҳисса қилиб, жавоб қайтараман. Яна қайтараман, ҳаётим давомида жавоб қайтараман. Ҳар бир ҳурматсизликни миямнинг энг тўрига исми, фамилияси, вақти соати, вазияти кунигача ўйиб ёзиб қўяман, — дейди у.
Audiодаги овоз соҳиби жамоа орасида унинг марҳамати билан жон сақлаб юрганлар борлигини қўшимча қилган.
Менсиз уларнинг ҳеч ўрни йўқ жамоада. Мана бу ҳақиқат. Аслида дастак бўлган мен, қўллаб-қувватлаган мен, лекин бугунги кунда менинг юзимга оёқ босиляпти. Бугун мени чеккалаяпти. Мен буни ҳис қиляпман. Мен сизларга айтиб қўяй, бунинг оқибати яхши бўлмайди. Мен сиз ўйлаган даражада масъума, бечора эмасман. Жудаям ёш, ҳеч нарсадан бехабар, фақат кечирадиган инсонни тасаввур қилаётган бўлсангиз, қаттиқ янглишяпсиз, адашяпсиз. Мен ҳаммасининг ҳисоб-китобини олиб юраман. Мени унутманг, мен чора кўришим мумкин. Ваколатим бор. Кўриб ҳам келяпман. Мактаб қоровулидан бошлаб, мендан кейин ким туради, ўша одамгача тааллуқли бу гаплар. Ҳайфсан бердим, мисол учун эртага яна битта хато қиласиз. Ойлингизга жарима. Учинчисида ишдан кетяпсиз, — дейди мактаб директори.
“Дарё” журналисти билан суҳбатлашган Самарқанд вилояти Мактабгача ва мактаб таълими бошқармаси ахборот хизмати раҳбари Бахтигул Қаршиева аудиодаги овоз Пайариқ туманидаги 2-мактаб дирекорига тегишли эканини тасдиқлади.
Ҳолат бугун ўрганилмоқда. Тез орада бу ҳақда бизга мурожаат қилган мурожаатчига жавоб берамиз, — деди масъул.
“Дарё” воқеалар ривожини кузатишда давом этади.
Изоҳ (0)