Қўқондаги қандолатчилик корхонасида майнинг ферма ташкил қилингани аниқланди

Қўқондаги қандолатчилик корхонасида майнинг ферма ташкил қилингани аниқланди. Бу ҳақда “Ҳудудий электр тармоқлари” матбуот хизмати хабар берди.

“Фарғона ҳудудий электр тармоқлари корхонаси”, “Ўзэнергоинспекция” вилоят бошқармаси ҳамда тегишли ташкилотлар ходимлари ҳамкорлигида ўтказилган навбатдаги рейд давомида, Қўқон шаҳрининг “Марғилон дарвозаси” маҳалла фуқаролар йиғини Шарқобод кўчасида қандолатчилик маҳсулотларини ишлаб чиқарувчи корхонада фуқаро А.А. томонидан ўзбошимчалик билан электр ҳисоблагичга ташқи таъсир кўрсатган ҳолда майнинг қурилмаларини тўғридан тўғри электр тармоғига улаб, ноқонуний равишда фойдаланиб келаётгани аниқланган.

Дастлабки ҳисоб-китобларга кўра, А.А. томонидан “Фарғона ҳудудий электр тармоқлари корхонаси” АЖ манфаатига 900 миллион сўмдан ортиқ (шундан майнинг фаолияти учун 800 миллион сўмга яқин) зарар етказилгани аниқланган.

Истеъмол қилган электр энергиясининг майнинг фаолиятини юритишда фойдаланган қисми учун амалдаги қонунчилкка кўра тарифга 5 баробар ўсувчи коэффициент қўлланилиб, жами 4 миллиард сўмлик қоидабузарлик далолатномаси расмийлаштирилган.

Бош прокуратура матбуот хизматининг маълум қилинишича, ҳолат юзасидан “Б.М.” оилавий корхонаси раҳбари А.А. нисбатан Жиноят кодексининг 169-моддаси 4-қисми “а” банди (жуда кўп миқдорда ўғрилик) билан жиноят иши қўзғатилиб, гумон қилинувчи шахс процессуал тартибда ушланган.

Ҳозирда тегишли ташкилотлар томонидан мазкур ҳолат юзасидан ўрганиш ишлари олиб борилмоқда.