Шойгу Украинанинг 2023 йилдаги йўқотишларини айтди

Ўтган йил давомида Украина армияси 215 мингдан ортиқ одам ва 28 мингта қуролидан айрилди, деди Россия мудофаа вазири Сергей Шойгу йиғилишда.

“Ўтган йил давомида душман йўқотишлари 215 минг кишидан ва 28 минг бирлик қуролдан ошди. Биз бутун жанговар алоқа чизиғи бўйлаб стратегик ташаббусни сақлаб турибмиз”, — деди у.

Декабрь ойи ўрталарида Шойгу жанговар ҳаракатлар бошлангандан бери Украина томонидан 383 минг киши ҳалок бўлгани ва яраланганини маълум қилганди. Унга кўра, июнь ойида қарши ҳужум бошланганидан бери Украина бўлинмалари 159 минг кишидан айрилган. 

“Ҳарбий техникадаги йўқотишларга келсак, июнь ойидан бери Украина Қуролли кучлари 766 та танк (жумладан, 37 та “Леопард”), 2 300 дан ортиқ бошқа зирҳли техникасини (жумладан, 50 та Bradley пиёда жанговар машинаси) йўқотди”, — деди вазир.

Мудофаа вазирлиги Россия армиясининг йўқотишлари ҳақида охирги марта 2022 йил сентябрида хабар берганди. Ўша вақтда 5 937 киши ҳалок бўлгани айтилган. 2023 йил 6 июнь куни Шойгу Украина ҳужуми бошланганидан бери сўнгги уч кун ичида Украина Қуролли кучларининг Россия томонидан уюштирилган ҳужумларини қайтариш чоғида 71 нафар ҳарбий хизматчи ҳалок бўлгани, яна 210 нафари яраланганини айтди.

Ўша ойнинг ўрталарида Россия президенти Владимир Путин Украина Қуролли кучларининг йўқотишлари ҳалокатли даражада экани ва “Россия Украинага қараганда ўн баравар кам одамидан айрилганини” айтди.