Россия бир қатор “дўст бўлмаган давлатлар” ҳудудидаги консулликларида президентлик сайловлари учун овоз бериш участкаларини ташкил қилмайди. Бу ҳақда дипломатик доиралардаги манбаларга таяниб, “Ведомости” хабар берди.
Маълум қилинишича, гап тегишли ҳукумат рўйхатига киритилган барча 49 давлат ҳақида эмас, балки уларнинг салмоқли қисми ҳақида кетмоқда. Бу борада якуний қарор ҳали қабул қилинмаган, маслаҳатлашувлар давом этмоқда. Тегишли масала бўйича якуний қарор январь ойида қабул қилиниши керак.
“Ушбу қарорнинг сабаби сайловчилар хавфсизлиги (масалан, 2018 йилда Европада элчихоналар олдида навбатлар пайдо бўлган), шунингдек, консуллик ходимлари сонининг қисқариши билан изоҳланади”, — дейилади хабарда.
Шу билан бирга, Россия Марказий сайлов комиссиясининг халқаро ҳамкорлик бўйича масъул аъзоси Павел Андреев хорижда сайлов участкаларини шакллантириш муддати 24 январь эканини айтди. Шу билан бирга, МСК овоз бериш кунига беш кун қолганда уларни шакллантиришнинг мутлақ ҳуқуқига эга.
“Хорижда овоз беришнинг қамрови аниқланмаган бўлса-да, Ташқи ишлар вазирлиги ва Россия дипломатик муассасалари мезбон давлатларнинг расмий органлари билан ўзаро ҳамкорлик қилиш, сайловчилар хавфсизлигини қандай таъминлашни баҳолаш мақсадида хавф ва имкониятларни таҳлил қилиш бўйича катта ишларни амалга оширмоқда”, — дейди расмий.
Россия Ташқи ишлар вазирлиги расмий вакили Мария Захарова департамент “ҳозир вазиятни ўрганаётганини” айтди.
“Биз давлатлардан хавфсизликни таъминлаш бўйича сўраймиз ва идоралараро ўрганиш натижаларига кўра, чет элда овоз беришни ташкил этиш схемаси бўйича қарор қабул қилинади”, — дея тушунтирди Захарова.
Изоҳ (0)