Тошкент шаҳри, Фарғона ва Андижон вилоятларида кучли таъсир қилувчи дори воситаларининг муомалага киритилишига чек қўйилди, деб хабар беради Бош прокуратура ҳузуридаги департамент.
Маълум қилинишича, департаментнинг Тошкент шаҳар бошқармаси Учтепа ва Чилонзор туман бўлимлари томонидан ДХХ ҳамда ИИББ ходимлари билан ҳамкорликда тезкор тадбирлар ўтказилган. Тадбирларда “А.С.”, “А” МЧЖ ва “Р.-Пҳ.” хусусий корхонасига қарашли дорихона сотувчилари харидорларга ҳеч қандай ҳужжатсиз жами 60 дона “Карбамазепин”, “Габанерв”, “Тебантин” номли кучли таъсир қилувчи дори воситаларини сотган вақтларида ушланиб, ушбу дорихоналардан яна 12 860 дона кучли таъсир қилувчи дори воситалари ашёвий далил сифатида олинган.
Худди шундай, департаментнинг Фарғона вилоят бошқармаси Учкўприк туман бўлими томонидан ўтказилган тезкор тадбирларда “Т.Пҳ.”, “А.С.” МЧЖларга қарашли дорихоналарнинг сотувчилари харидорларга ҳеч қандай ҳужжатларсиз жами 80 дона “Тебантин” номли кучли таъсир қилувчи дори воситасини сотган вақтларида ашёвий далиллар билан ушланган.
Департаментнинг Андижон вилоят бошқармаси томонидан ИИБ ходимлари билан ҳамкорликда ўтказилган тезкор тадбирда эса “Ўрикзор” МФЙ ҳудудида ҳаракатланиб келаётган Nexia-2 русумли автотранспорт воситаси тўхтатилиб кўздан кечирилганда, фуқаро Б.М.нинг ёнидан 50 дона “Лирика” номли кучли таъсир қилувчи дори воситаси ашёвий далил сифатида олинган.
Мазкур ҳолатлар юзасидан Жиноят кодексининг 251-1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Бундан олдин Сирдарёда психотроп дорилар савдоси билан шуғулланган шахслар қўлга олингани, ДХХ Тожикистон ва Қирғизистондан олиб келинган гиёҳванд моддалар савдоси билан шуғулланувчи шахслар ушлагани, Тошкент вилоятида ўтказилган назорат-рейд тадбирларида синтетик гиёҳванд воситаларини тайёрловчи лаборатория ташкил қилган шахслар қўлга олингани тўғрисида хабар берилганди.
Изоҳ (0)