Тошкент шаҳрида кучли таъсир қилувчи дори воситалари муомалага киритилишининг олди олинди

Тошкент шаҳрида кучли таъсир қилувчи дори воситалари муомалага киритилишининг олди олинди, деб хабар беради Бош прокуратура ҳузуридаги департамент.

Маълум қилинишича, департаментнинг Яшнобод туман бўлими томонидан ИИББ ходимлари билан ҳамкорликда тезкор тадбирлар ўтказилган. Тадбирлар давомида Фарғона—Тошкент йўналишида ҳаракатланиб келаётган Cobalt русумли автотранспорт воситаси тўхтатилиб кўздан кечирилганда, муқаддам судланган Л.Т. ва фуқаро О.И. ноқонуний даромад орттириш мақсадида 2,8 минг дона “Регапен” номли кучли таъсир қилувчи дори воситасини Тошкент шаҳрида ўтказиш мақсадида олиб келаётгани аниқланиб, ашёвий далил сифатида олинган.

Шу каби, Фарғона йўли кўчасида ўтказилган тезкор тадбирда фуқаро Ш.Х.нинг ёнидан 38 дона “Тропикамид” ва “Регапен” номли кучли таъсир қилувчи дори воситаси ашёвий далил сифатида олинган.

Департаментнинг Шайхонтоҳур туман бўлими томонидан ДХХ ва ИИББ ходимлари билан ҳамкорликда ўтказилган тезкор тадбирда эса “Ҳадра” МФЙ ҳудудида ҳаракатланиб келаётган Cobalt русумли автотранспорт воситаси тўхтатилиб кўздан кечирилганда, муқаддам судланган У.А. ва фуқаро Б.С.дан жами 32 дона “Тропикамид” ва “Зардекс” номли кучли таъсир қилувчи дори воситалари ашёвий далил сифатида олинган.

Мазкур ҳолатлар юзасидан Жиноят кодексининг 251-1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари ўтказилмоқда.

Бундан олдин Сирдарёда психотроп дорилар савдоси билан шуғулланган шахслар қўлга олингани, ДХХ Тожикистон ва Қирғизистондан олиб келинган гиёҳванд моддалар савдоси билан шуғулланувчи шахслар ушлагани, Тошкент вилоятида ўтказилган назорат-рейд тадбирларида синтетик гиёҳванд воситаларини тайёрловчи лаборатория ташкил қилган шахслар қўлга олингани тўғрисида хабар берилганди.