“Евронинг отаси”: Еврокомиссия собиқ раҳбари Жак Делор вафот этди

Европа комиссиясининг собиқ раҳбари Жак Делор вафот этди. Бу ҳақда унинг қизи Мартина Обри AFP’га маълум қилди.

Обрининг сўзларига кўра, Делор Париждаги уйида уйқусида вафот этган. У 98 ёшда эди.

Ғарб оммавий ахборот воситалари Делорни “евроннинг отаси” ва “замонавий Европа Иттифоқининг архитектори” деб аташади. Сиёсий фаолияти давомида у турли лавозимларда ишлаган, жумладан, Франция бош вазири Шабан-Делмаснинг маслаҳатчиси ва Социалистик партиядан Европа парламенти аъзоси бўлган.

1981 йилдан 1984 йилгача Делор Франция президенти Франсуа Миттеран ҳукуматида молия вазири, 1985 йилда эса Европа комиссиясини бошқаришга киришган.

Делорс Европа комиссиясига уч муддат —1995 йилгача раҳбарлик қилган. Бу ўн йиллик Европа Иттифоқи давлатларининг ички интеграциясини мустаҳкамлаш даври бўлди. Жумладан, умумий бозор маконини яратиш тугалланди, Шенген келишувлари тузилди, Erasmus талабалар алмашинуви дастури қабул қилинди, ягона Европа валютаси – евро ташкил этилди.

1995 йилда лавозимини тарк этгач, Делор сўровларда потенциал рақиблар устидан катта устунликка эга бўлишига қарамай, Франция президентлиги учун номзодини қўйишдан бош тортди. Делор бу қарорини мустақил қолиш истаги билан изоҳлади.

“Мен ҳеч нарсадан афсусланмайман, лекин ҳақ бўлганимни айтмайман”, — деб сиёсатчининг сўзларини келтиради Francе 24.

Франция президенти Эммануэль Макрон Делорнинг вафоти муносабати билан ҳамдардлик билдирди.

“Унинг фидойилиги, идеаллари ва ҳалоллиги бизни доимо илҳомлантиради”, — деб ёзган Макрон.

Шу билан бирга, Европа Комиссияси раҳбари Урсула фон дер Ляен Делорнинг меросига ҳурмат кўрсатишга чақирган.