Европадаги бир қатор расмийлар Венгрияни Украинага янги ёрдам пакети бўйича келишувда овоз бериш ҳуқуқидан маҳрум этиш масаласини кўриб чиқмоқда, деб хабар берди Financial Times манбаларга таяниб.
Бу қадам 2007 йилги Европа Иттифоқи тўғрисидаги шартноманинг еттинчи моддаси билан боғлиқ бўлиши мумкин, ушбу модда Европа қонунчилиги бузилиши муносабати билан аъзо мамлакатни овоз бериш ҳуқуқидан маҳрум қилиш имконини беради. Шу билан бирга, мазкур жараённи ЕИнинг исталган давлати блоклаши мумкин, бироқ яқинда ўтказилган сайловларда Польшада ҳокимиятга либерал мухолифат келганидан сўнг, Венгриянинг Европа Иттифоқида “кафолатланган ҳимоячиси қолмаган”, деб ёзади ФТ.
Нашр манбаларининг қайд этишича, Европа Иттифоқининг кўплаб давлатлари “ЕИнинг энг кучли қуроли иттифоққа аъзо давлатга қарши ишлатилиши” мумкинлигидан хавотирда. Европа расмийлари Украинага ёрдам бериш бўйича келишишдан бош тортаётган Венгрия бош вазири Виктор Орбанга Европа Иттифоқидаги изоляция “қанчага тушишини” кўрсатиб қўйиб, уни кўндирмоқчи.
Агар бу тактика иш бермаса, ЕИнинг қолган давлатлари Венгрия иштирокисиз Киевга алоҳида ёрдам бериш бўйича келишув тузиши мумкин, аммо бу кўп вақт талаб этади ва “фақат вақтинчалик ечим бўлади”, деб ёзади FT.
“Балки Венгрия янада кўпроқ муаммоларни келтириб чиқарар ёки бизни бошқа усуллардан фойдаланишга мажбур қилар. Аммо охир-оқибат Венгрия Украинага пул ажратишимизга тўсқинлик қила олмайди”, — деди нашр билан суҳбатда Европанинг юқори мартабали амалдори.
15 декабрь куни Венгрия бош вазири Виктор Орбан Европа Иттифоқининг Украинага 50 миллиард евро миқдорида иқтисодий ёрдам ажратиш ҳақидаги қарорига вето қўйди. Европа Кенгаши раҳбари Шарл Мишел Украинага ёрдам кўрсатишга фақат Венгрия қарши эканини таъкидлади. Айни ўша саммитда Европа Кенгаши Украина билан Европа Иттифоқига қўшилиш бўйича музокараларни бошлашга қарор қилди, бунга Орбан бир неча бор қарши чиққанди. Кейинчалик маълум бўлишича, Германия канцлери Олаф Шольц овоз бериш жараёнида Орбанни йиғилишни тарк этишга кўндирган, бу эса Европа Иттифоқи раҳбарларига музокараларни бошлашга қарор қилиш имконини берган.
Изоҳ (0)