Тошкентдаги иссиқ сув қувурларидан бирида авария ҳолати юз берди 

Тошкент шаҳар Миробод туманининг айрим кўчаларида иссиқ сув таъминоти бир неча кун давомида бўлмайди. Бу ҳақда туман ҳокимлиги матбуот хизмати хабар берди.

Қайд этилишича, Миробод тумани Нукус—Ойбек кўчаси кесишмасида жойлашган иссиқ сув қувурларида 7-октябр куни авария ҳолати юз берган.

Veolia Energy Tashkent Миробод тумани бўлими томонидан ҳозирги кунда узунлиги 698 метр бўлган диаметри 700 миллиметр магистрал иссиқлик қувурлари куз-қиш мавсумини беталафот ўтказиш учун бутунлай янгисига алмаштирилмоқда.

Шу туфайли Ойбек кўчаси бўйлаб жойлашган №40, 42, 44, 46, 48, 50, 55, 57, 59, 61, 63-рақамли кўп қаватли уйлар, шунингдек, Нукус кўчасида жойлашган №37-уй, Хонзодабегим кўчасидаги №3,9, Т.Шевченко кўчасидаги №12, 64 уйда иссиқ сув таъминоти 7-октябрда ўчирилган.

Юқорида санаб ўтилган манзилларда иссиқ сув таъминоти иш тугаши биланоқ (тахминан 20-октябрда) тикланади.

Veolia Energy Tashkent истеъмолчилардан келтирилган ноқулайликлар учун узр сўрайди.

Аввалроқ Бектемир ва Учтепа туманларида табиий газ етказиб бериш, шунингдек, Сергели ва Бектемир туманларида электр энергияси таъминоти вақтинча тўхтатилиши тўғрисида хабар берилганди. Октябр бошида эса  Мирзо Улуғбек, Яшнобод, Бектемир туманларининг қатор манзилларида иссиқ сув таъминоти вақтинча тўхтатилганди.