Тошкентдаги хонадонда юз берган ёнғинда аёл ва унинг икки қизи ҳалок бўлгани ҳақида хабар берилганди. Марҳуманинг қайнотаси ҳодиса ҳақида айтиб берди.
Воқеа Яшнобод туманидаги хонадонларнинг бирида 18 декабрь куни юз берган. Ҳолат акс этган видео ижтимоий тармоқларда тарқалганди.
Маълум бўлишича, ушбу ёнғинда 28 ёшли аёл ҳамда унинг 8 ва 5 ёшдаги икки қизи вафот этган. Ҳолат юзасидан Жиноят кодексининг 259-моддаси (ёнғин хавфсизлиги қоидаларини бузиш) билан жиноят иши қўзғатилган.
Марҳуманинг қайнотаси ҳодиса оқибатида қудаси уйсиз қолганини, ҳеч ким улардан хабар олмаганини айтмоқда.
“Қудамнинг жаҳли чиқаётгани ҳеч ким келиб хабар олмади. Қудам билан уч кишини йўқотдик. Қудамнинг катта қизи эди, менинг катта келиним. Иккита неварам эди. Фақат йиғлаймиз. Улар уйсиз қолди. Ҳар куни сарсон юра олмайдилар-ку. Уларга уй-жой керак”, — дейди марҳуманинг қайнотаси.
Яшнобод туман ҳокимлиги масъул ходими уларга вақтинча яшаб туриш учун уй топилганини ва кўчириш ишлари олиб борилишини маълум қилди.
“Хонадон эгалари вақтинча яшаб туриш учун уй-жой сўраган. Биз маҳалла ҳудудидаги кўп қаватли уйлардан хонадон топдик. Лекин улар фожиа содир бўлган уйи кўриниб тургани учун бу хонадонда яшашга розилик бермади. Биз бошқа ҳудуддан уларга вақтинча яшаб туриш учун уй топдик. Бугуннинг ўзида кўчириш чоралари кўрилади”, — дейди ҳокимлик ходими.
Изоҳ (0)