“Куёвим икки боласини олиб чиқолган”. Тошкентда ёнғинда қолиб қизлари билан вафот этган аёлнинг тоғаси воқеа ҳақида айтиб берди

Тошкентдаги хонадонда юз берган ёнғинда аёл ва унинг икки қизи ҳалок бўлгани ҳақида хабар берилганди. Марҳуманинг тоғаси ҳодиса ҳақида айтиб берди. 

Воқеа Яшнобод туманидаги хонадонларнинг бирида 18 декабрь куни юз берган, ҳолат акс этган видео ижтимоий тармоқларда тарқалганди.

Маълум бўлишича, ушбу ёнғиндан 28 ёшли аёл ҳамда унинг 8 ва 5 ёшдаги икки қизи вафот этган. Ҳолат юзасидан Жиноят кодексининг 259-моддаси (ёнғин хавфсизлиги қоидаларини бузиш) билан жиноят иши қўзғатилган. 

“Шунақа аланга олдики, 20 дақиқага қолмай тўкилиб тушди. Ичида синглимнинг қизи — жияним икки боласи билан қолиб кетди. Куёвимиз иккитасини олиб чиқиб қолган”, — дейди марҳуманинг тоғаси. 

Воқеа жойига ёнғин-қутқарув экипажи беш дақиқада етиб борган. Ёнғин 8:00 да тўлиқ ўчирилган. Етиб борганда айтилган манзилда том ва ички қисм тўлиқ ёнаётгани аниқланган. Олов 20 дақиқа ичида бартараф этилган. Аммо тез ёрдам хизмати етиб келганида вайроналар остида қолган оиланинг уч нафар аъзосининг жонсиз танаси олиб чиқилган.