Toshkentdagi xonadonda yuz bergan yong‘inda ayol va uning ikki qizi halok bo‘lgani haqida xabar berilgandi. Marhumaning qaynotasi hodisa haqida aytib berdi.
Voqea Yashnobod tumanidagi xonadonlarning birida 18-dekabr kuni yuz bergan. Holat aks etgan video ijtimoiy tarmoqlarda tarqalgandi.
Maʼlum bo‘lishicha, ushbu yong‘inda 28 yoshli ayol hamda uning 8 va 5 yoshdagi ikki qizi vafot etgan. Holat yuzasidan Jinoyat kodeksining 259-moddasi (yong‘in xavfsizligi qoidalarini buzish) bilan jinoyat ishi qo‘zg‘atilgan.
Marhumaning qaynotasi hodisa oqibatida qudasi uysiz qolganini, hech kim ulardan xabar olmaganini aytmoqda.
“Qudamning jahli chiqayotgani hech kim kelib xabar olmadi. Qudam bilan uch kishini yo‘qotdik. Qudamning katta qizi edi, mening katta kelinim. Ikkita nevaram edi. Faqat yig‘laymiz. Ular uysiz qoldi. Har kuni sarson yura olmaydilar-ku. Ularga uy-joy kerak”, — deydi marhumaning qaynotasi.
Yashnobod tuman hokimligi masʼul xodimi ularga vaqtincha yashab turish uchun uy topilganini va ko‘chirish ishlari olib borilishini maʼlum qildi.
“Xonadon egalari vaqtincha yashab turish uchun uy-joy so‘ragan. Biz mahalla hududidagi ko‘p qavatli uylardan xonadon topdik. Lekin ular fojia sodir bo‘lgan uyi ko‘rinib turgani uchun bu xonadonda yashashga rozilik bermadi. Biz boshqa hududdan ularga vaqtincha yashab turish uchun uy topdik. Bugunning o‘zida ko‘chirish choralari ko‘riladi”, — deydi hokimlik xodimi.
Izoh (0)