2024 йилда Украина армиясининг асосий йўналиши Қрим бўлиши мумкин, материкдаги фронт чизиғи эса деярли ўзгаришсиз қолади. Бу ҳақда The Economist Украина президенти Владимир Зеленский билан суҳбатдан сўнг маълум қилди.
“Ушбу яриморол Украина жанубидаги рус қўшинлари учун муҳим таъминот йўли ҳисобланади; унинг 2014 йилда аннексия қилиниши Путин учун ташвиқот ғалабаси бўлди. Украинанинг Қримга муваффақиятли ҳужумлари Россиянинг имкониятларига путур етказади ва Путинни шарманда қилади”, — дейилади хабарда.
Таъкидланишича, шу пайтгача Украинанинг Ғарбдаги тарафдорлари Зеленскийнинг таъсирчан баёнотлари ҳарбий ва молиявий ёрдам олиш учун етарли бўлади, деб тахмин қилган. Бироқ энди АҚШ ҳарбий ёрдами ва Европа Иттифоқидан молиявий ёрдам кўрсатиш тўхтатилиши фонида, ғарблик сиёсатчилари нега Ғарб Украинани қўллаб-қувватлашда давом этиши кераклигини тушунтириш вазифасини ўз зиммаларига олиши керак.
Украинага Конгрессда қолиб кетган 61 миллиард долларлик ёрдам АҚШ мудофаа бюджетининг атиги 6,9 фоизини ташкил қилади. Евроиттифоқнинг Украинага сарфлаган харажатлари эса унга аъзо давлатлар ялпи ички маҳсулотининг кичик бир қисмидан иборат.
“Ҳолбуки, ғалаба қозонган Россияни ушлаб туриш нархи Украина ғалабасини қўллаб-қувватлаш нархидан анча катта бўлади. Ғарб етакчилари Украинага нақд пул жўнатиш бўйича ўз далилларини келтириши керак. Буни ҳозирданоқ бошлашлари керак”, — дейилади хабарда.
Изоҳ (0)