Жанубий Корея Бирлашган штаб бошлиқлари қўмитасининг маълум қилишича, 5 январь куни эрталаб КХДР ҳарбийлари Жанубий Кореянинг Пэннёндо ва Ёнпхёндо ороллари яқинида 200 га яқин артиллерия ўқларини отган. Бу ҳақда CNN хабар бермоқда.
Yonhap аниқлик киритишича, снарядлар Сариқ денгиздаги шимолий демаркация чизиғи яқинидаги буфер зонага – икки давлатнинг амалдаги денгиз чегарасига тушган.
Сеул маълумотларига кўра, отишмада ҳеч ким жабрланмаган. Жанубий Корея ҳарбийлари КХДР ҳаракатларини “провокация” деб атади ва Пхеньянни уларни зудлик билан тўхтатишга чақирди.
Шимолий Кореянинг ҳаракатларига жавобан Жанубий Корея ҳарбийлари Сариқ денгиздаги чегара оролларида ўт очиш машғулотларини ўтказишни режалаштирмоқда.
Сеул “Шимолий Корея томонидан ҳарбий провокация аломатлари фонида” Ёнпхёндо оролидаги тинч аҳолини бошпаналарга эвакуация қилишни буюргани хабар қилинди.
КХДР расмийлари Жанубий Корея баёнотларига ҳозирча изоҳ бермаган.
2018 йил сентябрида Шимолий Корея ва Жанубий Корея икки давлат чегарасидаги қуролсизлантирилган ҳудуд яқинида кенг кўламли артиллерия ва дала ўқув машғулотларини тўхтатишга, шунингдек, унинг яқинида ҳарбий самолётлар парвозини чеклашга келишиб олганди. Мамлакатлар ўртасидаги келишув Сариқ денгизда ҳарбий-денгиз машқлари ўтказилмайдиган буфер зонани яратишни назарда тутган.
2023 йилнинг ноябрида Шимолий Корея Сеулни “провокацион манёврларда” айблаб, келишувни бекор қилди.
Изоҳ (0)