Жиззах вилоятида Gentra автомобилларида хавфли ҳаракатларни амалга оширган қоидабузар ҳайдовчиларга чора кўрилди. Бу ҳақда “Марказий студия” информацион дастурида маълум қилинди.
Қайд этилишича, мазкур ҳолат 30 июнь куни Жиззах вилоятида бир гуруҳ ҳайдовчилар йўлда белгиланган қоидаларга зид равишда ҳаракат қилган. Суриштирув ишлари давомида “шаҳар бизники”, дея бақирган ушбу қоидабузарлар вилоятнинг Зомин туманида яшовчи фуқаролар экани маълум бўлган.
“Қилган ишимиздан афсусдамиз, иккинчи маротаба қайтарилмайди, кечирим сўраймиз”, — дейди қоидабузарлардан бири.
Ҳозирда ушбу ҳайдовчиларга нисбатан Маъмурий жавобгарлик тўғрисидаги кодекснинг 129-моддасига (транспорт воситалари ҳайдовчиларининг йўл ҳаракати хавфсизлигига таҳдид солувчи гуруҳ бўлиб ҳаракат қилишда қатнашиши) асосан маъмурий баённома расмийлаштирилган ва транспорт воситалари жарима майдонига жойлаштирилган.
Қоидабузар ҳайдовчилар
2023 йилнинг февраль бошларида Қашқадарё вилояти Қарши шаҳрида 5 февраль куни тўй кортежи йўлнинг ҳар иккала қатнов қисмини тўсиб, гуруҳ бўлиб ҳаракатлангани тўғрисида хабар берилганди. Уларга нисбатан Маъмурий жавобгарлик тўғрисидаги кодекснинг тегишли моддаларига асосан, маъмурий баённома тузилиб, автомашиналар вақтинчалик сақлаш майдончасига қўйилган.
Апрель охирларида эса Бухоро шаҳрида транспорт воситалари ҳаракатига халақит берган тўй кортежи автомобиллари вақтинчалик жарима майдонига жойлаштирилган эди. Шунингдек, 2022 йилнинг июлида Наманганда транспорт воситалари ҳаракатига халақит берган тўй кортежи автомобиллари жарима майдонига жойлаштирилган.
Изоҳ (0)