Сирдарё вилояти Гулистон шаҳрида олиб қочилган машина ЙТҲgа учраган ҳолда топилди. Бу ҳақда вилоят ИИБ ахборот хизмати хабар берди.
Хабарга кўра, Гулистон шаҳар, “Навбаҳор” маҳалласи Хондамир кўчасида содир бўлган. Вояга етмаган Ш.О. мазкур кўчада турган Nexia’ни ғайриқонуний равишда очиб, калити турганидан фойдаланиб, уни олиб қочган.
У машинада кетаётган вақтида бошқарувни йўқотиши оқибатида Гулистон шаҳар 6-сонли умумтаълим мактаби биносини ўраб турувчи темир панжарага катта тезликда бориб урилган ва автомашинани қолдириб, ўзи ҳодиса жойидан яширинган.
Мазкур ҳолат юзасидан Гулистон шаҳар ИИБ ҳузуридаги Тергов бўлими томонидан фуқаро Ш.О.га нисбатан Жиноят кодексининг 267-моддаси 1-қисми билан жиноят иши қўзғатилган бўлиб, ҳозирги кунда тергов ҳаракатлари олиб борилмоқда.
Олиб қочилган машиналар
Қорақалпоғистоннинг Нукус шаҳрида олиб қочилган Trailblazer ағдарилган ҳолда топилган эди. Шунингдек, Тошкент вилоятининг Олмалиқ шаҳрида ўзганинг Spark автомобилини олиб қочишда гумонланган 6 нафар йигит қўлга олинган. Бундан ташқари Наманган вилояти Чортоқ туманида вояга етмаган шахс автомашинани олиб қочиб, йўл-транспорт ҳодисасига учрагани хабар қилинган.
Изоҳ (0)