Пенсия жамғармаси ижро этувчи аппарати раҳбарияти ўз жамоасига коррупция билан боғлиқ ҳуқуқбузарликларни содир этган ходимлар жавобгарликка тортилишини эслатиб, мурожаат қилди.
Фото: “Дарё” / Мадина Нурман
Маълум қилинишича, товламачилик ва порахўрлик иллатлари жамғарма фаолиятида ҳамон учрамоқда.
“Бугунги кунда лоқайдлик, бефарқлик, иккиюзламачилик, товламачилик, фирибгарлик, уруғ-аймоқчилик, таниш-билишчилик, порахўрлик каби иллатлар Пенсия жамғармаси тизимида ҳам ҳали-ҳамон учраётганига гувоҳ бўлиб турибмиз. Соҳада коррупция ҳолатларига йўл қўймаслик тўғрисида Пенсия жамғармаси ижро этувчи аппарати томонидан мунтазам равишда профилактик суҳбатлар ва тушунтириш ишлари олиб борилмоқда”,— дея қайд этган жамғарма.
Мурожаатда коррупция хавфини баҳолаш, ходимларни коррупцияга қарши курашишга ўқитиш ва уларнинг малакасини ошириш тизими жорий этилгани ҳам эслатилган.
“Коррупция билан боғлиқ ҳуқуқбузарликларни содир этган ходимлар ўзининг мавқеи ва эгаллаб турган лавозимидан қатъи назар Ўзбекистон Республикаси қонунчилиги ва Пенсия жамғармасининг ички идоравий ҳужжатларига мувофиқ жавобгарликка тортилади. Жамғарманинг ҳар бир ходими коррупциявий ҳаракат содир этилганига доир ишончли ва асосли маълумотлар мавжуд бўлганда Пенсия жамғармаси раҳабриятига, ҳудудий бошқарма ёки туман (шаҳар) бўлими раҳбарига ҳеч қандай тўсиқсиз мурожаат қилиши шарт”, —дея огоҳлантирган жамғарма.
Қўшимча қилинишича, номзодларни ишга қабул қилишда уларнинг шахсий ва касбий сифатлари, очиқлик, адолат ва холислик принциплари асосида танлов бўйича саралаш коррупсяга қаршиш курашишнинг асосий мезонларидан саналади.
Жамғармага жисмоний ва юридик шахслар томонидан йўлланган коррупцион ҳолатларга доир мурожаатлар тўлиқ, холис ва ўз вақтида кўриб чиқилиши таъминланади.
Изоҳ (0)