“Байрам болаларники, улар шифохонада ҳам буни унутмасликлари керак” — Наманган ҳокими

Наманган шаҳар ҳокими Анваржон Отахўжаев 31 декабрь куни шаҳар болалар шифохонасида бўлиб, беморларни йўқлади. Бу ҳақда “Дарё” мухбири Азизбек Абдувалиев хабар бермоқда.

Шифохонада бугунги кунда 400 нафар бола даволанмоқда. Уларнинг барчаси учун эрта тонгдан байрам совғалари келтирилди.

“Байрам болаларники, улар шифохонада ҳам буни унутмасликлари керак. Агар шу баҳона чекаётган дардларини бир оз бўлса ҳам арицак, вазифа уддаланди десак ҳам бўлади”, — деди шаҳар ҳокими.

Анваржон Отахўжаев мутасаддилар билан биргаликда палаталарни айланиб, болалар ва уларнинг оналаридан ҳол-аҳвол сўради. Қорбобо ва Қорқиз ҳамроҳлигида байрам совғаларини топширди.

Шаҳар шифохонаси ҳудудига катта дошқозон ўрнатилиб, беморлар ва тиббиёт ходимлари учун 60 килограмм палов тайёрланди.