Зоир Мирзаев президент ҳар бир қарор ва фармойишини имзолашдан аввал вилоят ҳокимлари фикрини ҳам сўрашини маълум қилди (видео)

Тошкент вилояти ҳокими Зоир Мирзаев “Дарё” журналисти билан суҳбати давомида Ўзбекистон президенти Шавкат Мирзиёев қабул қилаётган ҳар бир қарор ва фармойишини вилоят ҳокимлари фикрини ҳам инобатга олган ҳолда имзолашини маълум қилди. 

Бугунги кунда давлат раҳбаримиз қандай қарор ёки фармон чиқарса, лойиҳаси бизга келади. Фикр билдириб, тагига виза қўйиб, қўшимча фикрларимиз бўлса, ёзиб берамиз. Бу илгари бўлмаган. Илгари қарор келарди. Кейин ишламай қолди, нима бунақа бўлди бўларди. Лекин ҳозир тепадан, шахсан президентимизнинг ўзлари ташаббускор, бош-қош бўляптиларки, ҳар қанақанги қабул қилинадиган қарор, у маслаҳатлашган, кўпчилик билан кенгашган ҳолда қабул қилинса, хатодан ҳоли бўлади. Пастга тушиб, бунинг айланиб кетиши ҳам осон бўлади деган нуқтаи назардан ёндашув бўляпти. Шунинг учун бизда ҳам бу табиий ҳол. Нафақат вилоят ҳокимлари туман ҳокимлари билан ҳам маслаҳатлашиб турамиз, — дейди Зоир Мирзаев. 

Тошкент вилояти ҳокимининг маълумот беришича, президентнинг маҳаллалар фаолиятига доир қарори қабул қилинишидан аввал вилоят ҳокимларига ҳам юборилиб, уч маротаба муҳокама қилинган. 

Ижтимоий ҳимоя агентлиги бўлаётганида жуда кўп, беш-олти маротаба муҳокама бўлган. Ўзлари (президент Шавкат Мирзиёев, Таҳририят изоҳи) икки маротаба ўтказган бўлса, кейин пастда ҳам бўлди. Ҳамма жойда айланиб, ҳаттоки, фуқаролар фикри ҳам олиб чиқилди. Якунида ўша қарор қабул қилинди. Ана шундагина қарор халқчил қарор бўлади, — дейди вилоят ҳокими. 

Зоир Мирзаевга кўра, халқ ва унинг вакиллари фикри инобатга олинмай қилинган қарор узоққа бормайди. 

Халқчил қарорда халқнинг фикри инобатга олинган бўлиши шарт. Агар шундай бўлмаса, бу қарор пастга тушгач, тўхтаб қолади, — деди ҳоким.

Ҳоким суҳбат давомида ҳар йили Янги йил байрами арафасида қўл остида фаолият юритувчи ходимларининг оиласи ва бола-чақасини байрам билан қутлаши, ўз фаолиятига доимий тарзда танқидий ёндашиши, Telegram да унга мурожаат қилиб, шикоят қилган депутат ва давлат раҳбарининг бирор бир қарорни қабул қилишидан аввал вилоят ҳокимлари билан ҳам маслаҳатлашиши ҳақида ҳам гапириб берди.