АҚШ Украинага янги 250 миллион долларлик ҳарбий ёрдам пакетини юбормоқда. АҚШ Давлат котиби Энтони Блинкен пакет ҳақида эълон қилар экан, бу 2023 йилдаги охирги ёрдам бўлишини таъкидлади.
Пентагон томонидан эълон қилинган рўйхатга кўра, янги ёрдам пакетига қуйидагилар киради:
- НАSAМS зенит-ракета тизимлари учун ўқ-дорилар;
- Stinger портатив ҳаво мудофаа тизимлари учун ўқ-дорилар;
- ҳаво мудофааси тизимларининг таркибий қисмлари;
- HIMARS ёппасига ўт очувчи реактив тизимлари учун ўқ-дорилар;
- 155 ва 105 мм калибрли артиллерия снарядлари;
- ТОW танкка қарши тизими учун ракеталар;
- Javelin ва АТ-4 танкка қарши тизимлари;
- 15 миллиондан ортиқ ўқ-дорилар;
- тўсиқларни тозалаш учун ўқ-дорилар;
- эҳтиёт қисмлар, тиббий ва бошқа ёрдамчи ускуналар.
Аввалроқ Оқ уй Миллий хавфсизлик кенгашининг стратегик алоқалар бўйича координатори Жон Кирби ушбу пакет жўнатилгандан сўнг Украинага ёрдам учун маблағ тугашини айтиб, Конгрессни қўшимча ёрдам ажратишни тасдиқлаш жараёнини тезлаштиришга чақирган эди.
“Биз Конгрессни Украинага ўзини ҳимоя қилишда ёрдам бериш орқали миллий хавфсизлик манфаатларимизни таъминлаш учун тезкор ҳаракат қилишга чақиришда давом этамиз”, — деб ёзди Блинкен ҳам Х(собиқ Twitter)да.
Октябрь ойида АҚШ президенти Жо Байден Конгрессга хавфсизлик учун 100 миллиард доллардан кўпроқ, жумладан, Украинага 61 миллиард доллар ёрдам кўрсатишни сўраб мурожаат қилган. Республикачилар ва Демократик партиялар ўртасидаги келишмовчиликлар туфайли қонун лойиҳаси ҳалигача тасдиқланмаган. Жумладан, республикачилар қонун лойиҳасига АҚШ—Мексика чегарасида қўллаш учун қаттиқроқ чегара ва иммиграция чораларини киритишни истамоқда.
Изоҳ (0)