Покистон муваққат бош вазири Анвар-ул-Ҳақ Какар Ғазо сектори аҳолиси билан бирдамлик белгиси сифатида мамлакатда Янги йил байрамини нишонлаш тўлиқ тақиқланганини маълум қилди.
“Вазиятни инобатга олган ҳолда Покистон ҳукумати Янги йил билан боғлиқ барча байрамларни тақиқлашга қарор қилди”, — деди Анвар-ул-Ҳақ Какар Geo TV телеканалида ва аҳолини 2024 йилнинг илк тонгини муносиб камтарлик билан кутиб олишга чақирди.
У октябрь ойи бошидан бери Исроил армияси томонидан 21 мингдан ортиқ фаластинлик ўлдирилганини таъкидлади.
“Бутун Покистон халқи ва мусулмон дунёси Ғазо ва Ғарбий Соҳилда бегуноҳ болаларнинг ўлдирилиши ҳамда қуролсиз фаластинликларнинг геноцид қилиниши туфайли оғир азобни бошдан кечирмоқда”, — деди Какар.
Покистон глобал форумларнинг барчасида Фаластин халқининг оғир аҳволи масаласини кўтариб келмоқда ва бу келгусида ҳам давом этиши таъкидланган.
Аввалроқ Ғазо Соғлиқни сақлаш вазирлиги 7 октябрдан бери Исроил зарбаларидан ҳалок бўлган ғазоликлар сони 20,4 мингдан ошгани, 54 мингдан ортиқ киши жароҳатлангани ҳақида маълум қилганди.
Изоҳ (0)