Покистоннинг БМТдаги вакили Мунир Акрам кеча 20 декабрь куни бўлиб ўтган Хавфсизлик Кенгашининг Афғонистон бўйича йиғилишида Афғонистонда террорчи гуруҳларнинг мавжудлиги бу давлат, минтақа ва дунё учун жиддий таҳдид эканини айтди.
Акрамнинг айтишича, Афғонистонда покистонлик “Толибон” ва унга алоқадор гуруҳларга “эркинлик берилган” ва улар Афғонистон ичидан Покистон хавфсизлик кучларига ҳужум қилмоқда.
Унинг сўзларига кўра, Ғарб кучлари қолдирган замонавий қурол-яроғларни қўлга киритиш билан покистонлик “Толибон” ҳаракатининг ҳужумлари янада хавфли тус олган.
Мунир Акрам покистонлик “Толибон” нинг таҳдидини ўта жиддий деб таърифлаб, улар қўлига етиб келган замонавий Америка қуроллари юзасидан БМТ томонидан текширув ўтказилишини талаб қилди.
Покистон вакили “Толибон” ҳукумати билан ҳар қандай ҳамкорлик сиёсати “Толибон” нинг террорчи гуруҳларга қарши ҳаракатларига асосланиши керак деб ҳисобламоқда. Акс ҳолда, 11 сентябрь каби Афғонистондан нафақат минтақага, балки бутун дунёга таҳдид солаётган терроризмнинг тарқалишига гувоҳ бўламиз, дейди у.
Покистоннинг Бирлашган Миллатлар Ташкилотидаги вакили, шунингдек, “Толибон” ҳаракати аёлларнинг меҳнат ва таълим олиш ҳуқуқига қўйилган чекловларни бекор қилиши кераклигини таъкидлади.
Изоҳ (0)