“Илгари энг тубан ҳаётда яшаганман” — актёр ва режиссёр Азамат Аҳроров нималардан афсусланиши ҳақида (видео)

Актёр ва режиссёр Азамат Аҳроров “Дарё”нинг YouTube’даги каналига берган интервьюсида илгари залолат ҳаётида яшагани, унинг ўзгаришига сабаб бўлган инсон ҳақида гапирди.

— Илгари энг тубан ҳаётда яшаганман. Яширмайман ичардим, наша чекардим ва қизлар билан юрардим. Ҳозир эсласам афсусланадиган ҳаётим бўлган. Суратга олган фильмларимдан катта-катта маблағ топганман, аммо баракаси бўлмаган.

Бир инсонга ишониб, Captiva русумли автомобиль харид қилганман. Машинанинг давлат рақами фирманинг номида бўлган, у фирманинг эгаси қайсидир иши учун озодликдан маҳрум этилган. Captiva’ни тортиб олишлари ҳақида эшитганимдан кейин уни яшириб қўйганмиз. Беш йил машинани яшириб сақладик, кейинчалик машинани ўз номимга расмийлаштириб олдим. У вазиятда жуда қийин бўлган, пулсиз қолиб кетганман. “Кўча” номли сериални суратга олиб, унга ҳам анча вақтгача телеканалдан пулини ололмай юрганман. Мен кўча ҳаётини яхши биламан, чунки болаликдан шу муҳитда улғайганман, — дейди Азамат Аҳроров.

Актёр тубан ҳаётдан чиқишига қизалоғининг дунёга келиши сабаб бўлгани ҳақида ҳам сўзлаб берди.

— Оила қуриб, биринчи фарзандимни қўлимга олганимда улғайганимни ҳис қилдим. Оталик мени ўзгартирди. Ҳозир ҳам ўзимни кўп нарсадан тияман, хусусан ахлоқсизлик бўлган ерларга боришдан сақланаман. Аввалги танишларим билан кўришиб қолсам, уларни оилавий ўтириш мумкин бўлган ерларга олиб боришга ҳаракат қиламан.

Бундан ташқари, аввалги ҳаётимга қайтиб аёлим Дилнозанинг ҳам кўнглини оғритишни истамайман. Аввалги ҳаётимни турмуш ўртоғимдан яширмаганман. Жуда кўп қизлар билан ишқий муносабатда бўлганимни, ичиб-чекиб юрадиган бола бўлганимни яхши билади. Мадрасада ўқиган бола бўлмаганман. Санъатга кўча ҳаётидан кириб келганимни ҳам жуда яхши билади. Энг қизиғи, шоу-бизнес чиркинликлар тубида эканлигини ҳам кўпчилик яхши билади. Санъат вакилларининг ҳаёти ҳамиша айш-ишрат, маишат билан боғлиқ. Масалан тўйга борасиз у ерда ҳар хил одам билан тўқнашасиз. “Келинг ўтирамиз, гаплашамиз”, дейди. Ҳатто рад жавобини берсангиз, каттароқ одам бўлса эртага “запрет”га тушириб қўйиши ҳам мумкин. Шундай вазиятлардан қочишга ҳаракат қиламан.

Азамат Аҳроров илк марта аёли ҳақида гапириб, унга миннатдорлик билдириб ўтди.

— Мен билан яшаш осон эмас, аёлим ҳалигача қийналади. Одатда аёлим ҳақида гапиришни, ҳар хил фитналар бўлишини истамайман. Учта фарзандимиз бор, уларнинг парвариши ва тарбияси билан шуғулланишнинг ўзи катта иш. Доимий спорт билан шуғулланганим учун махсус рациондаги таомларни истеъмол қиламан. Аёлим менга, фарзандларимга ва ўзи учун алоҳида таом тайёрлайди. Энага, ёрдамчилар бўлса ҳам асосий қийинчилик ўзига тушади.

Тўғри йўлга кирганимдан кейин ҳаётимда жуда кўп нарсалар ўзгарди. Уй ва машина олдик, рўзғоримизга ҳам барака кирди. Тасаввур қилинг, ҳозирги кунда битта фильмимни киносаройда 70 мингта томошабин кўрса, қанча сумма бўлади. Мен йилиги камида тўртта фильм суратга оламан. 3-4 йил аввал томошабинлар сони бугунгидан анча кўп эди. Қанча пул топганимни тасаввур қиляпсизми? Аммо барака бўлмаган. Пул осонлик билан топилар ва айш-ишратга кетиб қоларди. Ҳеч нарса орттиролмасдим, ҳозир эса ойида 3 минг доллар топсам ҳам баракаси бўлади. Шунинг учун оилали бўлиш бараканинг асосий омили экан деб ўйлаб қоламан, — дейди Азамат Аҳроров.

Суҳбатни тўлиқ ҳолда қуйида томоша қилишингиз мумкин.