Ўзбекистонда хизмат кўрсатган артист, Кино арбоблари уюшмаси раиси, актёр Матёқуб Матчонов «Chotki TV» YouTube каналига берган интервьюсида фарзандлари, бизнесга қандай қизиқиб қолгани, «Ипподром»да, Дубайда нарса сотгани, нима сабабдан экранларда кўринмай қолгани, қанча ойлик олиши ва 120 минг долларга тенг машинасини ким олиб бергани ҳақида гапирди.
Матёқуб Матчонов фарзандлари ҳақида
«Учта фарзандим бор: иккитаси ўғил ва биттаси қиз. Қизим 12 йилдан бери ўзим билан туради, уни ҳам уч нафар фарзанди бор. Ҳеч кимга тош отгим келмайди. Невараларимнинг каттаси олти ёш, ўртанчаси 4 ёш ва кичиги 3 ёш бўлганда уйдан ҳайдаб юборишган. Чунки мен бир умр қуллуқ қилиб ўтишим керак эди, қиз берганим учун айбдорман. Билмадим, уларга тош отмайман. Қизим ҳам, учта фарзанди ҳам ўзимнинг қарамоғимда», — дейди актёр.
Бизнесга қандай қилиб қизиқиб қолгани, «Ипподром»да ва Дубайда нарса сотгани ҳақида
«Бизнесни бошлашим жуда ғалати бўлган. Ҳиндистонга 90-йилнинг бошида биринчи марта ўзбек гуруҳи билан кино олгани кетганмиз. «Алиф Лайло ёки маккора» фильмини суратга олиш учун бир қанча машҳур актёрлар: Обид Асомов, Мирзабек Холмедов, мен, Ҳусан Шарипов, Тамара Шокирова, Ойбарчин Бакирова билан борганмиз. Обид Асомов ўша пайтда «Овчи» фильми сабаб Ҳиндистонга бориб келганди, яъни у ернинг об-ҳавосини биларкан.
Кетаётган вақтимиз хурсанд бўлдик, унгача Германияга борган эдик. Шунда у буни олиш керак, уни олинг тирикчилик бўлади деб айтди. Кейин уйимдаги кичкина бўлиб қолган костюмим борми, беркитмайман, солдатлар киядиган пайпоқдан олибман нима қилишни билмай. Нима нарса олиб кетишни билмагандим. Бозорда туриб ҳамма нарсани сотдик. Обид Асомов нима сотилишини билган экан, фотоаппаратлар олган эди. Фотоаппаратлар яхши сотилар экан, бизга айтмаган, билмаганмиз. У шуни сотади, расмга олади, бу ерда биз қийиқча, пайпоқларни ушлаб турибман.
Қарасам пайпоқ киядиган одам йўқ, ҳамма ялангоёқ. Пайпоқни нима учун олиб келдинг дейдиган одам йўқ. Бошим қотди, бир тўда олиб боргандим. У ёқда биттаси қийиқча дейди, ҳеч ким олмайди. Бир пайт биттаси келиб қолди, кўйлак кийган, бўйинбоғ таққан. Менга ‘жўробий’, деди. Аввал тушунмадим, кейин билсам пайпоқ дегани экан. Ҳинд халқини бир қизиқ одати бор, икки киши тўпланса дарров гавжум бўлиб кетади. Кейин Мирза ҳам артистлик қилиб қийиқчаларни унақа қиласан, бошингга ўрайсан, белга боғласанг ҳам бўлади, жойнамоз қилсанг ҳам бўлади деб, бақир-чақир қилиб сотди.
Қўлимга уч-тўрт сўм пул тушди. Кейин бу пулга нарса олиш керак эди. Бозорга кирганимдан кейин бу нарса бизда бунча, униси унча деб солиштира бошладим. У пайти энди чарм курткалар пайдо бўлган вақт эди, қарасам чарм плаш, куртка бизникидан икки баробар арзон. Болаларимга бир-иккита нарса олдим, ўзимга ҳеч нарса олмай сотишга иккита плаш олдим. Сотганимдан кейин пул ёқиб қолди. Қарасам кинодан топган даромадимдан анча юқори даромад топиб қизиқиб қолдим. Кейин бу орада қарз билан бўлса ҳам Дубайга бориб фотоаппарат, соат сотиб секин-секин ишдан чалғимаган ҳолатда бизнесга киришиб кетдим.
Ўша пайтда одамларда пул йўқ эди, спектаклга кирмас эди. Ўз ҳисобимдан икки-уч ойда Дубайга бориб келиб бизнесни йўлга қўйдим. Кўп қийинчиликлар бўлган, Ипподромда ҳам нарса сотганман. Кўп нарсаларни эшитардим, одамлар олдимга келиб кўзойнакни олиб туринг, сиз ‘Бозор кўрмаган йигит‘даги актёрмисиз деган. Унақаларни ҳам, устимиздан кулганларни ҳам кўрганмиз. Ҳаёт шунақа экан», — дейди Матёқуб Матчонов.
Матёқуб Матчонов нима сабабдан экранларда кўринмай қолди?
«Таклифлар кўп, лекин улар мени қониқтирмаяпти. Гап пулда эмас, мен пул учун рол ўйнайдиган актёр эмасман, ҳамма нарсам етарли. Талабимга жавоб бермайди. Агар ўша ролларни ўйнасам халқни олдига чиқиб нима дейман? Мени шу даражага халқим олиб келди, эътироф этди, ҳурмат қилди, тўйга чақирди, халқни орқасидан маблағ топдим, бойлик йиғдим, иморат қилдим, хуллас кўп нарса бўлди. Ролларим, сабабли, шундан кейин ўзимга ёқмаган ролларни ўйнай олмайман», — дейди актёр.
Матёқуб Матчонов қанча ойлик олиши ва 120 минг долларлик машинани ким олиб бергани ҳақида
«Мен кўп жойдан ойлик оламан. Кино арбоблари уюшмаси раиси лавозимидан 3 миллион сўм ойлик оламан. Нархи 120 минг долларлик BMW машинани ўғлим 60 ёшга кирганимда совға қилган», — дейди Матёқуб Матчонов.
Мавзуга доир:
Изоҳ (0)