Иқтисодиёт ва молия вазирлиги Тошкент шаҳрида жойлашган “Қўйлиқ” ва “Чорсу” деҳқон бозорларидаги қишлоқ хўжалиги маҳсулотларининг 27 декабрдаги улгуржи нархлари ҳақида маълумот берди.
Ўрганишларга қараганда, “Қўйлиқ” бозорида ўтган ҳафта бошида максимум нархи 28 000 сўм (килоси) бўлган бодринг нархи бугун (27 декабрь) 57 000 сўмгача кўтарилди. Помидор нархи ҳам ошиб, килоси 23 000 сўмдан 30 000 сўмга етди.
Шу билан бирга, булғор қалампири килоси 18 000 сўмдан 25 000 сўмга, саримсоқ пиёз 25 000 сўмдан 33 000 сўмга, бақлажон 8 000 сўмдан 20 000 сўмгача қимматлашган.
Узумнинг энг юқори улгуржи нархи (бир кило учун) 75 000 сўмдан 80 000 сўмга ошди. Лимон нархи ҳам максимум 20 000 сўмдан 30 000 сўмга кўтарилди.
Вазирлик “Чорсу”да мол гўштининг килоси 60 000 – 70 000 сўмдан, қўй гўшти 65 000 – 70 000 сўмдан сотилаётганини маълум қилган. Умуман олганда, гўштнинг мазкур бозордаги улгуржи нархлари эълон қилина бошлаганден бери (уч ой давомида) ўзгармай келмоқда.
“Қўйлиқ” бозорида лазер гуручининг килосини 18 000 – 25 000 сўмдан, нўхатни 18 000 – 20 000 сўмдан, қизил ловияни 14 000 – 17 000 сўм, мошни 10 000 – 12 000 сўмдан харид қилиш мумкин.
Мазкур бозорда картошканинг килоси 2 200 – 4 800 сўм, пиёзники 1 200 – 2 200 сўм, сабзиники 1 000 – 2 500 сўм.
Мевалардан бананнинг нархи ҳам ўтган ҳафтадагидан 4 минг сўм қимматлаб, максимум 25 минг сўмдан сотилмоқда.
Вазирлик “Қўйлиқ” бозорида 28 турдаги мева, сабзавот, дуккакли ва гуруч маҳсулотлари нархлари бўйича маълумотлар эрталаб соат 5:00 дан 7:00 га қадар ўрганилганини қайд этган. “Чорсу” бозорида мол ва қўй гўшти нархлари бўйича маълумотлар эрталаб соат 5:00 ва 8:00 оралиғида йиғилгани эслатилган.
Изоҳ (0)