Президент фармони билан айрим истеъмол товарларига нисбатан божхона божи нол ставкада қўлланилиши узайтирилди.
“Истеъмол бозорларида асосий турдаги озиқ-овқат маҳсулотлари нархларининг барқарорлигини таъминлаш чора-тадбирлари тўғрисида”ги президент фармони қабул қилинди.
Фармонга кўра, президентнинг 2022 йил 31 майдаги ПФ-145-сон ва 2023 йил 23 мартдаги ПФ-41-сон фармонлари билан 2024 йил 1 январга қадар импорт божхона божининг нол ставкалари белгиланган товарларга импорт божхона божининг нол ставкасини қўллаш муддати 2025 йил 1 январга қадар узайтирилди.
Бундан ташқари, 2024 йил 1 январдан 2025 йил 1 январга қадар янги сўйилган, совитилган ёки музлатилган уй паррандаси гўшти ва қўшимча озуқабоп маҳсулотлар (ТИФ ТН коди 0207) ва кунгабоқар, махсар ёки пахта мойи ва уларнинг фракцияларини Ўзбекистонга олиб киришда божхона божининг нол ставкаси қўлланилиши белгиланди.
2023 йил 23 мартдаги президент фармони билан 2024 йил 1 январгача 36 турдаги озиқ-овқат маҳсулотларини Ўзбекистонга олиб киришда божхона божининг нол ставкаси қўлланилиши белгиланганди.
Хусусан, маҳсулотлар рўйхатида аҳолининг кундалик ратционида мавжуд сут маҳсулотлари, мевалар, дуккакли сабзавотлар, тайёр ёки консерваланган гўшт маҳсулотлари, макарон, таркибида какао бўлмаган қандолат маҳсулотлари, алкоголсиз ичимликлар, болалар кийимлари киритилган.
Статистика рақамларга кўра, 2022 йилда 1 273 та тадбиркорлик субъектлари томонидан Ўзбекистонга олиб кирилган 470 минг тонна шу турдаги товарлар учун 475,4 миллиард сўм божхона божи тўланган. Фармон қабул қилиниши натижасида 1 200 дан ортиқ тадбиркорлик субъектларининг 500 миллиард сўм пул маблағлари ўз ихтиёрларида қолиши прогноз қилинган.
Таҳлилларга қараганда, мазкур фармон асосида 2022 йилда ва 2023 йилнинг январь–май ойларида 431 та тадбиркорлик субъектлари хориждан олиб келган 301,2 минг тонна товарлари учун божхона божидан 905,4 миллиард сўм имтиёзлар қўлланган.
Изоҳ (0)