“Ҳаммаси яхши!” – фильм мухлисларининг севимли иборасига айланиб улгурган. “Уч савдойи”нинг ўзини эса томоша қилиб чарчамайдиган фильмлар сирасига киритиш мумкин. Картина ҳинд кинематографияси тарихида биринчи марта энг кўп маблағ тўплаган фильмга айланди.
2009 йилда намойиш қилинган картина 2013 йил “Тезлик 3” фильми намойиш этилгунига қадар барча даврлардаги энг кўп даромад келтирган ҳинд фильми рекордини ҳам ушлаб турди. Шунингдек, у Хитой ва Япония каби Шарқий Осиё мамлакатларида муваффақият қозонган ҳинд фильмларидан биридир.
“Уч савдойи” — ўтиш даври ва таълим тизимига бағишланган ажойиб сатира. Муҳандислик коллежининг уч талабаси катта ҳаётда қандай натижаларга эришгани ҳақида ҳикоя қилади. Аниқроғи ушбу картинада ҳаммаси ортга қараб содир бўлади. Ўтмишни тўғри тиклашдан олдин икки дўст узоқ вақтдан буён кўринмай кетган дўстини топишга отланади.
“Уч савдойи” олтита Filmfare Awards, шу жумладан, учта “Миллий фильм”, “Энг яхши машҳур фильм” каби мукофотларга сазовор бўлган. Хорижда эса Японияда бўлиб ўтган Videoyasan Awards танловининг бош совринига эга бўлган. Фильм ремейки ҳаттоки Мексикада ҳам суратга олинган.
Аммо ушбу фильмда ролга биринчи тасдиқланган актёрлар иштирок этмаган. Хабарларга кўра, Ражкумар Ҳирани фильм қаҳрамони учун уч актёр – Шоҳрух Хон, Жон Абрахам ва Саиф Али Хонни танлаган.
Шоҳрух Хон учун Амир Хон гавдалантирган Ранчо образи таклиф этилган. Аммо актёр “Менинг исмим Хон” фильми учун режиссёрнинг таклифини рад этишига тўғри келди. Картинада ҳаттоки Санжай Датт ҳам эпизодик ролни ижро этиши керак бўлган. Аммо бу ҳам амалга ошмаган.
Аршад Варси эса Фархан Куреши ва Ражу Растоги роли учун тавсия этилган. Афсуски, актёр ҳам вақт масаласи туфайли ролларни рад этган. Бундан аввал Аршад ва Санжай Ҳиранининг “Муннабой” фильмида иштирок этган.
Бундан ташқари, Анушка Шарма фильмда роль ижро этиши учун синаб кўрилган, аммо роль Карина Капурга насиб этган. Кейинчалик Анушка Ҳирани билан “ПиКей” картинасида бирга ишлаган.
Изоҳ (0)