Ta’lim tizimidagi muammolar haqidagi ajoyib satira — “Uch savdoyi” filmi suratga olinganiga 14 yil to‘ldi (foto, video)

“Hammasi yaxshi!” – film muxlislarining sevimli iborasiga aylanib ulgurgan. “Uch savdoyi”ning o‘zini esa tomosha qilib charchamaydigan filmlar sirasiga kiritish mumkin. Kartina hind kinematografiyasi tarixida birinchi marta eng ko‘p mablag‘ to‘plagan filmga aylandi.



2009-yilda namoyish qilingan kartina 2013-yil “Tezlik 3” filmi namoyish etilguniga qadar barcha davrlardagi eng ko‘p daromad keltirgan hind filmi rekordini ham ushlab turdi. Shuningdek, u Xitoy va Yaponiya kabi Sharqiy Osiyo mamlakatlarida muvaffaqiyat qozongan hind filmlaridan biridir.

“Uch savdoyi” — o‘tish davri va ta’lim tizimiga bag‘ishlangan ajoyib satira. Muhandislik kollejining uch talabasi katta hayotda qanday natijalarga erishgani haqida hikoya qiladi. Aniqrog‘i ushbu kartinada hammasi ortga qarab sodir bo‘ladi. O‘tmishni to‘g‘ri tiklashdan oldin ikki do‘st uzoq vaqtdan buyon ko‘rinmay ketgan do‘stini topishga otlanadi.

“Uch savdoyi” oltita Filmfare Awards, shu jumladan, uchta “Milliy film”, “Eng yaxshi mashhur film” kabi mukofotlarga sazovor bo‘lgan. Xorijda esa Yaponiyada bo‘lib o‘tgan Videoyasan Awards tanlovining bosh sovriniga ega bo‘lgan. Film remeyki hattoki Meksikada ham suratga olingan.



Ammo ushbu filmda rolga birinchi tasdiqlangan aktyorlar ishtirok etmagan. Xabarlarga ko‘ra, Rajkumar Hirani film qahramoni uchun uch aktyor – Shohrux Xon, Jon Abraxam va Saif Ali Xonni tanlagan.

Shohrux Xon uchun Amir Xon gavdalantirgan Rancho obrazi taklif etilgan. Ammo aktyor “Mening ismim Xon” filmi uchun rejissorning taklifini rad etishiga to‘g‘ri keldi. Kartinada hattoki Sanjay Datt ham epizodik rolni ijro etishi kerak bo‘lgan. Ammo bu ham amalga oshmagan.



Arshad Varsi esa Farxan Kureshi va Raju Rastogi roli uchun tavsiya etilgan. Afsuski, aktyor ham vaqt masalasi tufayli rollarni rad etgan. Bundan avval Arshad va Sanjay Hiranining “Munnaboy” filmida ishtirok etgan.

Bundan tashqari, Anushka Sharma filmda rol ijro etishi uchun sinab ko‘rilgan, ammo rol Karina Kapurga nasib etgan. Keyinchalik Anushka Hirani bilan “PiKey” kartinasida birga ishlagan.