Ижтимоий тармоқларда улғайган Кевин Маккаллистер иштирокидаги “Уйда ёлғиз” фильмининг давоми учун сохта трейлер тарқалди. У VJ4rawr2 YouTube канали муаллифи томонидан яратилган.
Сюжетга кўра, Гарри ва Марвин 30 йиллик қамоқдан сўнг ниҳоят озодликка чиқади ва Кевин Маккаллистердан ўч олишга бел боғлайди. Лекин 40 ёшли Кевин уларни яна бир бор таъзирини бериш ниятида жиноятчилар учун янгидан янги тузоқларни тайёрлаган.
Вазият қаҳрамоннинг болаликда олган руҳий жароҳатларини қўзғатади, шунинг учун у икки марта Рождествода уйда ёлғиз қолдирган онаси билан муносабатларини тартибга солишга ҳаракат қилади.
Трейлерда Маколей Калкин, Жо Пеши, Дэниел Стерн ва Кетрин О’ҳарани кўриш мумкин. Уларнинг барчаси замонавий технологиялар орқали ролларига қайтарилган. Видео муаллифи актёрлар иштирокида турли фильм ва сериаллардан кадрларни жамлаб, овоз ва монтаж устида қайта ишлаган.
Видео икки ҳафта ичида YouTube’да 3 миллиондан ортиқ кўрилди. Бундан ташқари Х ва TikTok ижтимоий тармоғида ҳам қизғин муҳокамаларга сабаб бўлмоқда. Кўпчилик фильмнинг Deepfake (сунъий интеллектга асосланган тасвир синтези техникаси) ёрдамида тайёрланган бўлишига қарамай, тўлиқ версиясини кўришни истаганини айтди.
Маълумот учун, режиссёр Крис Колумбнинг “Уйда ёлғиз” фильми 1990 йилда экран юзини кўрган, икки йилдан сўнг фильмнинг иккинчи қисми ҳам чиқарилган. Кейинчалик “Уйда ёлғиз” номи билан яна учта фильм чиқди, лекин улар асосий фильмларнинг мантиқий давоми эмас ва фильмларда бутунлай бошқача актёрлар қатнашган.
Изоҳ (0)