Фарғона водийсидаги об-ҳаво шароити туфайли қатор рейслар Тошкентга кўчирилди

Фарғона водийсидаги об-ҳаво шароити туфайли қатор рейсларга чекловлар киритилди, деб хабар беради Uzbekistan Airways матбуот хизмати.

Қайд этилишича, парвозлар хавфсизлигини таъминлаш мақсадида HY9801/9802 Наманган—Перм—Наманган, HY9805/9806 Наманган—Самара—Наманган йўналишлари ўзгартирилган жадвал бўйича Тошкент халқаро аэропортига/дан амалга оширилади.

HY9801/9802 авиақатновлари Тошкент—Перм—Тошкент йўналиши бўйича:

• Тошкентдан учиб кетиш маҳаллий вақт билан соат 09:00 да;
• Пермга учиб келиш маҳаллий вақт билан соат 13:00 да;
• Пермдан учиб кетиш маҳаллий вақт билан 15:00 да;
• Тошкентга учиб келиш маҳаллий вақт билан 18:10 да.

HY9805/9806 авиақатновлари Тошкент—Самара—Тошкент йўналиши бўйича:

• Тошкентдан учиб кетиш маҳаллий вақт билан 19:35 да;
• Самарага учиб келиш маҳаллий вақт билан 23:05 да;
• Самарадан учиб кетиш маҳаллий вақт билан 01:05 (эртаси кун);
• Тошкентга учиб келиш маҳаллий вақт билан 04:30 (эртаси куни).

Юқоридаги рейслар йўловчиларига рейсларни рўйхатдан ўтиш вақтидан эртароқ Тошкентга мустақил равишда етиб кетишлари тавсия этилади. Россия шаҳарларидан юқорида кўрсатилган рейслар бўйича саёҳат қилаётган йўловчилар Тошкент аэропортига етиб келганларида мустақил равишда муқобил транспортда Наманганга боришлари тавсия этилади.

“Рейслар вақти ўзгартирилган йўловчилар учун, жарима тўловларисиз чипталарни кейинги учиш саналарига қайта брон қилиш ёки чипта учун тўланган пулни тўлиқ қайтариб олиш ҳуқуқига эга. Ноқулайлик учун узр сўраймиз”, — дейилади хабарда.

Аввалроқ Тошкентдаги туман сабабли қатор рейслар Самарқанд, Бухоро ва Навоийдаги захира аэродромларга йўналтирилгани тўғрисида хабар берилганди.