“Ўзтемирйўлйўловчи” АЖ Фарғона филиалининг темирйўл вокзалларида молиявий интизом ҳамда чипта сотувчилар томонидан чипталарни расмийлаштириш технологияларига амал қилиш ҳолати мутахассислар томонидан ўрганилганда камомадлар аниқланди, деб хабар беради ЎзА.
Хусусан, филиалнинг Қўқон темирйўл вокзалида 2022 йилнинг апрель ойидан 2023 йилнинг май ойлари даврида банк пластик карталари орқали харид қилинган чипталарнинг расмийлаштирилишидаги сохта маълумотлар фош бўлган. Аслида қайтарилмаган чипталар буйруқларда кўрсатилиб, янги чипталар бегона шахслар номига қайта расмийлаштирилиши натижасида “Ўзтемирйўлйўловчи” АЖ манфаатларига 68,8 миллион сўм зарар етказилган.
Шунингдек, мутахассислар томонидан чиптахоналар ҳисоботлари банк айланма маълумотлари билан солиштирилганда Марғилон темирйўл вокзалида 298,8 миллион сўм, Фарғона шаҳридаги темирйўл чиптахонасида 66,6 миллион сўм камомад аниқланган.
Мазкур ҳолат юзасидан Жиноят кодекснинг тегишли моддалари билан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, май ойида “Дарё” нашрида “Билетлар қўлга чиқиб кетади”. Вилоятларга қатновчи поездлар чипталарини яширин сотиш ҳолатлари кўплиги айтилмоқда” номли материал эълон қилинган эди. Унда Facebook фойдаланувчилари томонидан Ўзбекистон темирйўл кассаларидан чипта сотиб олишда муаммолар юзага келаётгани, рейслар сони камлиги ва поездларнинг оралиқ интервали узунлиги юзасидан билдирилган фикрлари жамланган.
“Ўзтемирйўлйўловчи” АЖ ахборот хизмати мазкур материалга муносабат билдирди. Унда темирйўл транспортидан фойдаланишда йўловчилар жўнаш муддатидан 1 ой ва ундан ҳам олдинроқ чипталарни харид қилаётгани, шу боис байрамлар арафасида чипталар етишмаслиги кўпчиликда нотўғри тушунча уйғотгани айтилган эди.
Изоҳ (0)