Ўзбекистон иқтисодиёти сўнгги глобал муаммоларга чидамлилигини сақлаб қолди ва жадал суръатлар билан ўсишда давом этмоқда. Бу ҳақда мамлакатда ишчи ташрифини якунлаган Халқаро валюта жамғармаси (ХВЖ) миссиясининг ҳисоботида маълум қилинди.
Қайд этилишича, 2023 йил 11 декабрдан 19 декабргача бўлган даврда Ёсир Абдиҳ бошчилигидаги ХВЖ миссияси Ўзбекистон ҳукумати билан учрашиб, жорий иқтисодий вазият, иқтисодий ривожланиш истиқболлари ва иқтисодий сиёсатнинг устувор йўналишларини муҳокама қилган.
“Ўзбекистон иқтисодиёти сўнгги вақтларда юзага келган глобал чақириқларга мутлақ барқарорлигини намойиш этди. Геосиёсий нотинчликлар мигрантлар оқимига ва 2022 йилда мамлакат иқтисодиётига кирувчи пул ўтказмалари ҳажмининг сезиларли даражада ошишига олиб келди, бу эса ички талабнинг ўсишига хизмат қилди. Бу ташқи талабнинг ошиши билан биргаликда 2022 йилда ялпи ички маҳсулотнинг 5,7 фоизга реал ўсишига олиб келди”, — дейди Ёсир Абдиҳ ташрифи якунида.
Унинг сўзларига кўра, жорий йилда пул ўтказмалари Россиянинг Украинадаги урушидан олдинги тенденцияга тушиб қолган бўлса-да, бюджет харажатларнинг сезиларли даражада ўсиши, шунингдек, иш ҳақи ва экспортнинг кучли ўсиши 2023 йилда ЯИМнинг реал ўсишини 5,7 фоиз даражасида ушлаб туриши кутилмоқда.
Таъкидланишича, 2024 йилги прогнозлар ижобийлигича қолмоқда, бироқ хатарлар мавжуд. Бюджет консолидацияси зарурлигига қарамасдан, прогнозлар бўйича иқтисодий ўсиш 5 фоиздан юқорилигича қолмоқда.
Макромолиявий барқарорликни таъминлаш ва тизимли ислоҳотларни давом эттириш мураккаб глобал шароитда барқарорликни ошириш ва кучли иқтисодий ўсишни таъминлашнинг калитидир. 2023 йилда амалга оширилган кескин солиқ-бюджет сиёсати консолидацияланган бюджет йўналишига ўзгариши керак.
Аввалроқ Европа тикланиш ва тараққиёт банки Ўзбекистон иқтисодиёти 2023 ва 2024 йилларда 6,5 фоизга ўсишини прогноз қилганди. Банк ўзининг минтақавий ҳисоботида ташқи боғлиқликнинг нисбатан кучсизланишига қарамай, Ўзбекистон иқтисодиётига Россиянинг Украинага қарши урушининг янада кучайиши ва пул ўтказмаларининг қисқариши қийинчилик туғдириши мумкинлиги қайд этилган.
Жаҳон банки ҳисоб-китобларига кўра эса Ўзбекистон ялпи ички маҳсулотининг ўсиши 2023 йилда 5,5 фоизга яқинлашади.
Изоҳ (0)