Марказий банк кредит таклиф этиб, одамлар картасидан пул ечиб олаётган фирибгарлардан огоҳлантирди

Марказий банк кредит таклиф этиб, одамлар картасидан пул ечиб олаётган фирибгарлардан огоҳ бўлишга чақирди.

Қайд этилишича, ҳозирги кунда фирибгарларнинг интернетдан сохта телефон рақамлари орқали фуқароларга қўнғироқ қилиш ҳолатлари кузатилмоқда. Бунда фирибгарлар Марказий банк ходими сифатида ўзини таништириб, фуқароларнинг ишончига киришга уринмоқда.

Бундан ташқари, фирибгарлар Telegram’да Марказий банк номидан очилган “Markaziy_Banki_uz” сохта каналида фуқароларга онлайн кредитлар таклиф этиб, уларнинг банк карталарига оид маълумотларини қўлга киритиш орқали банк картасидаги пул маблағларини ўзлаштириш ҳолатлари кузатилмоқда.

Марказий банк бу каби хабар ва фойдаланувчига ҳеч қандай алоқаси йўқлигини маълум қилди ҳамда Марказий банк жисмоний шахсларга кредитлар ажратмаслиги, молиявий хизматлар кўрсатиш билан шуғулланмаслигини эслатди.

Фуқаролардан ушбу хабарларга эътибор қаратмаслик ва банк карталари маълумотларини учинчи шахсларга бермаслик, ҳеч қандай ҳаволага кирмаслик сўралади, — дейилади хабарда.

Эслатиб ўтамиз, август ойларида ҳам Марказий банк номидан кредит таклиф этиб, одамлар картасидан пул ечиб олаётган фирибгарлар яна фаоллашганди. 

Марказий банк мобил телефонга келган бир марталик SMS-код, мобил иловалар, веб-иловаларга кириш ҳуқуқини берувчи логин ва пароллар банк ходимлари томонидан сўралмаслиги, шу боис ҳеч кимга бундай маълумотларни бермаслик зарурлиги тўғрисида доимий огоҳлантириб келади.