Markaziy bank kredit taklif etib, odamlar kartasidan pul yechib olayotgan firibgarlardan ogoh bo‘lishga chaqirdi.
Qayd etilishicha, hozirgi kunda firibgarlarning internetdan soxta telefon raqamlari orqali fuqarolarga qo‘ng‘iroq qilish holatlari kuzatilmoqda. Bunda firibgarlar Markaziy bank xodimi sifatida o‘zini tanishtirib, fuqarolarning ishonchiga kirishga urinmoqda.
Bundan tashqari, firibgarlar Telegram’da Markaziy bank nomidan ochilgan “Markaziy_Banki_uz” soxta kanalida fuqarolarga onlayn kreditlar taklif etib, ularning bank kartalariga oid ma’lumotlarini qo‘lga kiritish orqali bank kartasidagi pul mablag‘larini o‘zlashtirish holatlari kuzatilmoqda.
Markaziy bank bu kabi xabar va foydalanuvchiga hech qanday aloqasi yo‘qligini ma’lum qildi hamda Markaziy bank jismoniy shaxslarga kreditlar ajratmasligi, moliyaviy xizmatlar ko‘rsatish bilan shug‘ullanmasligini eslatdi.
Fuqarolardan ushbu xabarlarga e’tibor qaratmaslik va bank kartalari ma’lumotlarini uchinchi shaxslarga bermaslik, hech qanday havolaga kirmaslik so‘raladi, — deyiladi xabarda.
Eslatib o‘tamiz, avgust oylarida ham Markaziy bank nomidan kredit taklif etib, odamlar kartasidan pul yechib olayotgan firibgarlar yana faollashgandi.
Markaziy bank mobil telefonga kelgan bir martalik SMS-kod, mobil ilovalar, veb-ilovalarga kirish huquqini beruvchi login va parollar bank xodimlari tomonidan so‘ralmasligi, shu bois hech kimga bunday maʼlumotlarni bermaslik zarurligi to‘g‘risida doimiy ogohlantirib keladi.
Izoh (0)