Қозоғистоннинг Олмаота шаҳрида “Сергек” жамоатчилик ва йўл ҳаракати хавфсизлигини таъминлашнинг интеллектуал тизими пиёдалар ўтиш жойларида одамларни ўтказмайдиган ва хавфсизлик камарини тақмайдиган ҳайдовчиларни аниқлайди. Бу ҳақда Республика ИИВга таяниб, “Курсив” хабар берди.
Лойиҳадан мақсад нима?
Лойиҳанинг мақсади ҳайдовчиларнинг транспорт интизомини мустаҳкамлаш ва пиёдалар билан тўқнашувлар сонини камайтиришдан иборат. Эътиборли жиҳати, тизим нафақат қоидабузарлик мавжудлигини, балки контекстни ҳам ҳисобга олади.
“Агар ҳайдовчи пиёда йўлни кесиб ўтгандан кейин ўтиб кетган бўлса, бу қоидабузарлик ҳисобланмайди. Бироқ ҳайдовчи пиёдага эътибор бермай, унга йўл бермаса, қоидабузарлик қайд этилади ва ҳайдовчига жарима солинади. Тизим, шунингдек, пиёда ва транспорт воситаси бир хил чорраҳа зонасида бўлган қоидабузарликларга ҳам жавоб беради”, — дейилади хабарда.
Ҳайдовчилар қандай жазоланади?
Ҳуқуқбузарларга нисбатан Қозоғистон Маъмурий жавобгарлик тўғрисидаги кодексининг 600-моддаси (Йўл ҳаракатида пиёдалар ёки йўл ҳаракатининг бошқа иштирокчиларига устунлик бермаслик) бўйича жазо қўлланади. Қоидаларни бузиш 34,5 минг тенге (тахминан 75,60 доллар) миқдорида жарима тўлашга сабаб бўлади.
Бундан ташқари, “Сергек” пилот режимида ҳайдовчи ва олд ўриндиқдаги йўловчининг тақилмаган хавфсизлик камарлари каби йўл ҳаракати қоидабузарликларини қайд қилишни бошлайди. Қоидага риоя қилмаслик 17250 тенге (салкам 38 доллар) миқдорида жаримага олиб келади.
Полиция маълумотларига кўра, жорий йилнинг 11 ойида 556 нафар пиёда автомобиллар ғилдираклари остида ҳалок бўлган, улардан 478 нафари пиёдалар ўтиш жойларида қайд этилган.
Изоҳ (0)