Франция Сенатидан кейин Миллий ассамблея (парламентнинг қуйи палатаси) ҳам мунозарали иммиграция қонун лойиҳасини маъқуллади. 19 декабрь куни 349 депутат ҳужжатни қўллаб-қувватлади, 186 нафари эса унга қарши чиқди.
Қонун лойиҳаси ноқонуний мигрантларни депортация қилишни соддалаштириш ва миграция квоталарини жорий этишни назарда тутади. Баъзи ижтимоий нафақаларни олиш шартлари кучайтирилади — энди Европа Иттифоқидан ташқаридаги мамлакатлардан келган ишсиз муҳожирлар Францияда 5 йил бўлганидан кейингина бундай нафақа олиши мумкин.
Бундан ташқари, Франция ҳуқуқ-тартибот идоралари ходимларига қарши жиноят содир этган икки фуқаролиги бўлган шахслардан француз паспорти олиб қўйилиши мумкин.
“Бугун қаттиқ чоралар кўриш зарурати мавжуд”, — деди овоз бериш тугаганидан кейин ички ишлар вазири Жералд Дарманен.
Елисей саройининг иккинчи йирик лойиҳаси
Франция президенти Эммануэл Макрон учун иммиграция қонунчилигини ислоҳ қилиш пенсия ислоҳотидан кейинги иккинчи йирик лойиҳадир. Бироқ қонун лойиҳасини қабул қилиш қийинчиликлар билан бирга кечди. Бир неча кун олдин парламент бу ҳужжатни рад этганди.
Асл нусхада қонун лойиҳаси мигрантларнинг интеграциялашувига кўмаклашиш, шунингдек, Францияга ноқонуний йўллар билан келганларни депортация қилишни соддалаштиришга қаратилган эди. Бироқ кейинчалик Макрон тарафдорлари кўпчиликни ташкил этмайдиган Сенатда ҳужжатнинг аксарият бандлари қатъийлаштирилди.
Изоҳ (0)