АҚШ Сенати Украина ва Исроилга қўшимча ёрдам кўрсатиш, шунингдек, мамлакат жанубий чегарасида хавфсизликни кучайтириш билан боғлиқ чора-тадбирлар пакетини кейинги йил бошига қадар овозга қўймайди, деб хабар бермоқда Reuters.
“Декабрь ва январь ойларидаги таътил пайтида музокарачиларимиз жуда пухта иш олиб боради, мақсадимиз — ишга қайтишимиз биланоқ бирор чора кўриш”, — деди Сенатдаги Демократик партия раҳбари Чак Шумер журналистларга.
Йил охиригача келишувга эришилмаслиги ҳақидаги маълумотни республикачи сенатор Жон Тьюн ҳам тасдиқлаган.
Шу билан бирга, Сенатдаги икки партия етакчилари Чак Шумер ва Митч Макконнелл қўшма баёнотида музокарачилар “рағбатлантирувчи” муваффақиятга эришганини, бироқ улар ҳалигача баъзи “мураккаб масалаларни ҳал эта олмаганини” таъкидлаган.
Октябрь ойида АҚШ президенти Жо Байден Конгрессдан хавфсизликни таъминлаш учун қўшимча 100 миллиард доллар, жумладан, Украинага ёрдам бериш учун 61 миллиард доллар ажратишни сўраган эди. Худди шу қонун лойиҳаси Исроилга ҳарбий ёрдам ва АҚШнинг жанубий чегарасида ҳимоя иншоотларини қуриш харажатларини ўз ичига олади. Оқ уй бу масалаларни Конгрессга алоҳида олиб чиқишдан бош тортди.
Республикачилар ва Демократик партиялар ўртасидаги келишмовчиликлар туфайли қонун лойиҳаси ҳалигача келишиб олинмаган. Жумладан, республикачилар қонун лойиҳасига АҚШ—Мексика чегарасида қўллаш учун қаттиқроқ чегара ва иммиграция чораларини киритишни истамоқда.
Изоҳ (0)